Edhe pse punëtorët e hidrocentralit të Ujmanit (Gazivodës) prej 5 shkurtit, po kërkojnë nga Qeveria shkarkimin e drejtorit të tyre, Predrag Bozhoviqit, duket se ai e ka mbështetjen e ministrit të MZHE-së, Blerand Stavileci dhe Bordit të Ibër Lepencit, ndërmarrje kjo që menaxhon me këtë hidrocentral.
Shkarkimi i drejtorit teknik të Ujmanit, Predrag Bozhoviq, i cili është familjar i Ratomir Bozhoviqit, njërit nga dy të dyshuarit për vrasjen e policit Enver Zymberit, është njëra nga dy kërkesat kryesore për realizimin e të cilat punëtorët e Ujmanit dy herë patën hyrë në grevë, e të cilën thonë se do ta vazhdojnë porsa të ndalen të reshurat, pasi që ato kanë sjellë sasi të madhe të ujit në pendë dhe fillimi i grevës do ta rrezikonte shpërthimin e pendës.
Sipas raportimeve të mediave qendrore, familjari i drejtorit teknik të Ujmanit, Ratomir Bozhoviqi, thuhet se merr rrogë nga strukturat paralele në Zubin Potok.
Ashtu siç ka raportuar në vazhdimësi Veriu.info, punëtorët e Ujmanit po kërkojnë shkarkimin e anëtarëve të Bordit të Ibër Lepencit dhe drejtorit të tyre, Predrag Bozhoviqit, si kusht për mos vazhdimin e grevës, e cila ka si pasojë ndërprerjen e prodhimit të energjisë elektrike në këtë hidrocentral.
Për herë të parë këta punëtorë hynë në grevë më 5 shkurt, ku i dërguan të shkruara kërkesat e tyre tek kryeministri Mustafa dhe ministri i MZHE-së, Blerand Stavileci, por nuk morën asnjë përgjigje, derisa ishte KFOR-i që ndërhyri për ta pezulluar punëtorët grevën herën e parë, me kusht që KFOR-i ta lehtësoj dialogun me nivelin qendror. Por duket se Kryeministria dhe MZHE-ja, e cila menaxhon me ndërmarrjet publike, po e mbrojnë me çdo kusht familjarin e të dyshuarit për vrasjen e Enver Zymberit, pasi që asnjëherë nuk u përgjigjen në kërkesat e grevistëve, edhe pse nëse këta i radikalizojnë veprimet, atëherë kanë paralajmëruar ndërprerjen e ujit që shkon në KEK dhe vetëm pas disa orësh nuk do të mund të prodhohej asnjë kilovat energji elektrike, që do të kishte për pasojë lënien e gjithë Kosovës në terr.
Punëtorët grevistë gjatë kohës së grevës kishin treguar se si drejtori teknik Predrag Bozhoviq, kishte mbajtur me paga pjesëtar të strukturave paralele të cilët asnjëherë nuk kishin shkuar në punë, ndërsa i kishte trajtuar keq punëtorët të cilët e kishin pranuar sistemin e Kosovës dhe i kishin nënshkruar kontratat e Kosovës.
Qeveria e Kosovës vazhdimisht ankohet se shumica e serbëve nuk janë bashkëpunues me institucionet e Kosovës, mirëpo ky shembull tregon se edhe kur ata i drejtohen në mënyrë institucionale Qeverisë, prapë injorohen dhe nuk merren parasysh kërkesat e tyre.
Veriu.info mëson se drejtori teknik i Ujmanit, Predrag Bozhoviq, është emëruaar nga ish Kryeshefi ekzekutiv i ndërmarrjes publike “Ibër Lepenc”, Hajdar Beqa, i cili sa ishte kryeshef e kishte mbrojtur nga disa tentativa për ndërrim që kanë qenë atëherë. /Veriu.info/
