Të martën e javës së ardhshme pritet që në Kuvendin e Kosovës të diskutohet plani qeverisës i kryeministrit Isa Mustafa.
Qeveria bënë të ditur se e ka dërguar dokumentin në Kuvend dhe se të martën ai pritet që të dalë për diskutim para deputetëve.
Partitë opozitare për një kohë të gjatë kishin kërkuar nga qeveria që ta dërgonte planin qeverisës për diskutim, mirëpo pavarësisht premtimeve të vet kryeministrit një gjë e tillë nuk kishte ndodhur.
Ky plan ishte paraparë që të dilte në kuvend qysh në muajin shkurt.
Albunena Haxhiu nga Vetëvendosje, thotë se Qeveria e Isa Mustafës nuk ka një plan të detajuar qeverisës. Ajo thotë se qeveria vetëm sa ka zbuluar disa pjesë të planit qeverisës, mirëpo sipas saj, ato janë skandaloze.
Haxhiu thotë se plani i qeverisë nuk garanton zhvillim ekonomik e as social.
Nga ana tjetër, deputetja e AAK-së, Donika Kadaj – Bujupi thotë se qeveria e ka fshehur qëllimisht deri tani këtë dokument. Sipas saj, qeveria e Isa Mustafës nuk ka asnjë energji dhe se është vetëm vazhdim i keqqeverisjes së vendit.
Kadaj-Bujupi thotë se Mustafa bëri premtime të shumta gjatë fushatës zgjedhore dhe se plani i tij qeverisës nuk garanton zhvillim ekonomik.
Kryeministri Mustafa në kuadër të fushatës zgjedhore kishte bërë premtime të shumta, madje kishte folur edhe për qindra-mijëra vende pune./koha/
