Është proceduar për në seancën e Kuvendit Projektligji që ndalon pjesëmarrjen e qytetarëve të Kosovës në luftërat jashtë vendit.
Me shumicë votash, pos deputetit të Vetëvendosjes Rexhep Selimi, që votoi kundër, anëtarët e Komisionit për Punë të Brendshme dhe Siguri i dhanë dritën e gjelbër që deputetë ta shqyrtojnë në seancë plenare, transmeton KP.
Kryetari i Komisionit për Punë të Brendshme dhe Siguri, Daut Haradinaj, tha se me shumicë votash po ia dërgojnë seancës plenare për miratim këtë projektligj.
“Propozimi i deputetit Zafir Berisha, natyrisht shkon në seancë ky propozim është pa përkrahjen e komisionit, seanca i jep dritën jeshile. Me siguri se deputeti Selimi e dinë që ka të drejt që brenda seancës t’i mbroj qëndrimet e veta dhe natyrisht në rast se i bind deputetët ta merr besimin e tyre”, tha Haradinaj.
Rexhep Selimi i cili ishte kundër këtij projektligji tha se amendamentet e tij do t’i paraqes në seancë plenare dhe deputetët do të vendosin. Ai rekomandoi që të mos votohet ky projektligj.
“Ne e kuptojmë që komisioni ka për detyrë që pas amendementimeve të rekomandojë Seancës Kuvendit që ta votoj ose jo Projektligjin. Gjatë votimit do të duhet të kërkohet se çfarë t’i rekomandojmë Seancës. Rekomandimet ose amendamentet e mija që unë i rekomandoj në emër të grupit tim parlamentar, do t’i parashtroj në Seancë dhe gjatë procedimit, gjatë votimit të amendamenteve në seancë shpresoj që edhe Kuvendi në bazë të rregullores t’i procedojë, dhe unë do t’i arsyetoj ashtu siç i kam arsyetuar këtu”, tha Selimi.
Ndërsa, amendamentet e propozuara nga deputeti i Nismës për Kosovën Zafir Berisha, i kanë shkuar seancës plenare, por pa përkrahjen e Komisionit.
Po ashtu sot Komisioni vendosi formimin e dy grupeve punuese, atë për projektligjin për komisionarin e Policisë së Kosovës dhe grupi punues për mbikëqyrjen e zbatimit të ligjit për Policinë e Kosovës. grupin e parë do ta udhëheq deputeti Rexhep Selimi, ndërsa të dytin Nuredin Ibishi.
