Avni Dehari, babai i Astrit Deharit dhe deputet i Lëvizjes Vetëvendosje, ka mbrojtur partinë që është në pushtet lidhur me kritikat për mungesë të veprimeve në zbardhjen e vdekjes së të birit.
Duke folur në Debat Plus, në 10-vjetorin e vdekjes së Astrit Deharit, ai ka thënë se, ndonëse Vetëvendosje më herët e kishte ngritur zërin për këtë rast, fakti që tash është në pushtet nuk nënkupton se mund të ndërhyjë në punën e prokurorisë.
Dehari ka thënë se pyetjet e gazetarëve se pse VV-ja, tash në pushtet, nuk po bën më shumë për zbardhjen e rastit, kanë, sipas tij, një prapavijë.
“Shumë gazetarë, me qëllim apo pa, me dashje apo pa, me të drejta apo pa, e kanë shtruar pyetjen pse tash VV-ja që është në pushtet, përpara e ka ngritur zërin, tash nuk po bën asgjë për zbardhjen e rastit. Unë mendoj që kjo ka një prapavijë”, ka deklaruar ai.
Sipas tij, kritikat lidhen me pretendimet e mëhershme se udhëheqësia e Vetëvendosjes, në krye me Albin Kurtin, kishte përgjegjësi për vdekjen e Astrit Deharit.
“Sepse qysh e kanë fajësuar atëherë udhëheqësinë e VV-së, në krye me Albin Kurtin, që ata e kanë çu Astritin drejt vdekjes, e ndërsa atëherë e kanë çu drejt vdekjes, tash nuk po bëjnë asgjë, se ata janë fajtor. Mirëpo, e dinë që prokurorët kanë pushtet të pavarur prej Qeverisë”, ka thënë Dehari.
Ai ka bërë dallim mes veprimeve të institucioneve në qeverisjet e mëparshme dhe atyre aktuale, duke pretenduar se në të kaluarën kishte ndërhyrje politike në punën e prokurorisë, ndërsa sipas tij, qeveria aktuale nuk ka ndërhyrë në këtë institucion.
“Dallimi është i madh, si nata me ditën. Sepse ata që ishin në pushtet përpara ndërhynin te kryeprokuroria, thoshin: shpalleni vetëvrasje. Kanë nxjerrë fletarrest që t’i ndjekin ata që po thonë që nuk është vetëvrasje”, ka deklaruar ai.
Dehari ka përmendur edhe ish-ministren e Drejtësisë, Albulena Haxhiu, duke thënë se ajo nuk ka ndërhyrë në punën e prokurorëve, por ka kërkuar zbardhjen e rastit.
“Kur e ke Albulena Haxhiun, që ka qenë ministre e Drejtësisë, më e përgjegjshme, nuk ka ndërhyrë në pushtetin e prokurorëve, por ka kërkuar që ky rast të zbardhet”, ka thënë Avni Dehari.
