Kryetari i Lidhjes Demokratike të Kosovës (LDK), Lumir Abdixhiku, ka reaguar lidhur me zhvillimet pas miratimit të ndryshimeve në Ligjin për Dhomat e Specializuara, duke thënë se kanë kaluar më pak se 48 orë dhe tashmë, sipas tij, është dëshmuar se iniciativa nuk prodhon efektin juridik që iu premtua qytetarëve, raporton Ekonomia Online.
Abdixhiku ka thënë se LDK-ja kishte paralajmëruar për këtë që në seancën e 5 tetorit, duke akuzuar kundërshtarët e saj se e kishin shfrytëzuar dhimbjen dhe emocionet e qytetarëve për përfitime politike.
“Ende pa u mbushur 48 orë, qenkan habitur që ligji nuk prodhon efektin juridik që ju premtuan. Që e gjithë kjo nismë e ide ishte veç një mashtrim me emocionet e një populli të lënduar.
PO, JU KANË MASHTRUAR!
DHE PO, UA KEMI THËNË!
Do ta kishit kuptuar me kohë, sikur në vend të vërsuljes ndaj LDK-së dhe shpalljes së saj si kundërshtare të UÇK-së, të dëgjonit çfarë po thonim. Por kur beteja e vogël partiake bëhet më e rëndësishme se përpjekja kombëtare, kur hileqarët marrin zë e tregtarët e mendimit drejtojnë gishtin, kur askush s’guxon të thotë se ‘mbreti është lakuriq’, atëherë më e lehta është t’i vërsulesh arsyes – mes tradhtarëve që s’janë dhe patriotëve që shtiren”, ka shkruar Abdixhiku.
Ai ka thënë se pas kalimit të më pak se 48 orëve, sipas tij, “perdet kanë rënë”, ndërsa ka theksuar se qytetarët janë lënë të mashtruar.
“E pastaj nuk kalojnë as 48 orë dhe perdet bien. Zhurma mbetet veç jehonë, e vërteta s’lëkundet; por një popull mbetet i mashtruar!
Ky ishte qëndrimi i LDK-së, lëvizjes më të madhe shqiptare për liri, pavarësi e demokraci, më 5 tetor, në Kuvendin e Republikës. Nuk e dëgjuan atëherë, le ta lexojnë me vëmendje sot”, ka deklaruar ai.
Abdixhiku më pas ka rikthyer qëndrimin zyrtar të LDK-së të 5 tetorit, ku kjo parti kishte theksuar se lufta e UÇK-së është e shenjtë, por se veprimet institucionale duhet të jenë në përputhje me Kushtetutën dhe detyrimet ndërkombëtare të Kosovës.
“Për Lidhjen Demokratike të Kosovës, lufta e Ushtrisë Çlirimtare të Kosovës është e shenjtë. Pikërisht për këtë, çdo veprim institucional duhet t’i shërbejë drejtësisë, mbrojtjes së të drejtave të të akuzuarve dhe interesit të Kosovës.
Familjeve dhe qytetarëve u detyrohemi sinqeritet. Nuk mund t’u premtojmë se një votim në Kuvend mund të zhbëjë një aktgjykim apo ta zëvendësojë betejën juridike”, thuhet në qëndrimin e LDK-së, të cilin Abdixhiku e ka publikuar sërish.
Sipas LDK-së, Dhomat e Specializuara mbështeten në një kornizë kushtetuese dhe në detyrime ndërkombëtare të Kosovës, ndërsa ndryshimi i një ligji të zakonshëm nuk do të mund t’i shfuqizonte këto detyrime.
“Dhomat e Specializuara mbështeten në një kornizë kushtetuese dhe në detyrime ndërkombëtare të Republikës së Kosovës. Ndryshimi i një ligji të zakonshëm nuk i shfuqizon këto detyrime dhe nuk mund ta anashkalojë Kushtetutën. Prandaj, vetë miratimi i ndryshimeve në Kuvend nuk garanton zbatimin e tyre dhe as rezultatin që po u premtohet qytetarëve.
Nëse dispozitat shpallen antikushtetuese, ato mund të shfuqizohen. Kjo nismë, rrjedhimisht, mund të mos prodhojë efektin juridik që pretendohet, ndërkohë që pasojat e saj politike dhe ndërkombëtare mund t’i mbeten Kosovës”, thuhet në qëndrimin e LDK-së.
LDK-ja kishte bërë të ditur se për këto arsye nuk do të bëhej pjesë e kësaj nisme, duke paralajmëruar për rreziqet e mundshme juridike, politike dhe ndërkombëtare.
“Për këto arsye, Lidhja Demokratike e Kosovës nuk mund të bëhet pjesë e kësaj nisme. LDK paralajmëron me kohë për rreziqet e mundshme juridike, politike dhe ndërkombëtare që ajo bart. U bëjmë thirrje propozuesve dhe deputetëve që t’i marrin seriozisht këto rreziqe dhe të veprojnë në interes të drejtësisë dhe të Republikës së Kosovës”, thuhej në qëndrimin e 5 tetorit.
LDK-ja kishte theksuar se qëndrimi i saj buron nga përgjegjësia ndaj Kosovës dhe se nuk dëshiron të krijojë, siç thuhet, shpresa të rreme te qytetarët.
“Qëndrimi ynë buron nga përgjegjësia ndaj Kosovës. Ne nuk e mashtrojmë popullin me iniciativa që nuk prodhojnë efektin juridik që u premtohet qytetarëve. Nuk ushqejmë shpresa të rreme dhe nuk i përdorim dhimbjen e ndjenjat e njerëzve për përfitime politike. Çështje kaq të ndjeshme kërkojnë seriozitet juridik dhe koordinim me aleatët tanë”, thuhet në qëndrimin e LDK-së.
