Ish-kryetari i Aleancës, Ramush Haradinaj, ka thënë se është në nderin e kësaj legjislature dhe të çdo legjislature që t’i vazhdohet mandati ish-presidentit Hashim Thaçi, duke e cilësuar këtë si një kundërpërgjigje ndaj, siç ka thënë ai, armiqve të Kosovës.
Haradinaj ka deklaruar se çështja e marrëveshjes për presidentin është “alibi” dhe se ka edhe opsione të tjera për të mos e mbajtur peng Kosovën.
“Çështja e marrëveshjes për president, edhe kjo është një alibi. Një alibi që ndodh qëllimshëm. Pra, e shtyn,. Edhe në këtë mandat të dytë që po e djeg, pra, e shihni, çdo 48 orë duhet të thirret seanca, në qoftë se do me gjetë zgjidhje Kurti, pra regjimi i Kurtit, me thënë të drejtën, është nderi i kësaj legjislature, po edhe i çdo legjislature, që t’ia vazhdojmë mandatin Presidentit Thaçi. Atij i është marrë mandati me një ndërhyrje ligjore, dhe me kthimin e tij, është në nderin tonë, si shqiptarë, si komb, jo për shkak të ndonjë afërsie partiake apo politike, po për shkak të një kundërpërgjigjeje ndaj armiqve të Kosovës që kurrë nuk flenë, që t’ia vazhdojmë mandatin.
Ka edhe X opsione të tjera, mos me e mbajtur peng Kosovën. Pra, po e thëm edhe një herë, armiqtë nuk flenë, regjimi i Kurtit po do me e vënë në gjumë Kosovën.”
Haradinaj ka kritikuar edhe mosvazhdimin e seancës konstituive, duke thënë se pas skadimit të afatit të parë 30-ditor.
“ Kuvendi është inekzistent. E vërteta është që është djegie e mandatit të atyre që janë zgjedhur, është djegie e mundësisë, edhe kjo po ndodh nga regjimi i Kurtit, nga Kurti, regjimi i tij, për shkak se ai e ka instaluar veten mbi Kushtetutën, mbi ligjin, mbi çdo obligim kushtetues dhe ligjor.”
Ai ka thënë se arsyetimi për mos thirrjen e seancës për shkak të mundësisë së dhunës është “vetëm alibi”.
“Mosthirrja e seancës me arsyetimin që, mbasi s’ka marrëveshje, ndodh dhunë në seancë, është vetëm alibi. Dhuna ka ndodhur edhe një dhunë që e shpreh frustrimin, mllefin e qytetarëve, pra gjuajtja me vezë për Kurtin, jo pse ka thirrë seancën, po pse s’po kandidon kryetarin e Kuvendit, që është detyrë dhe obligim i tij e i partisë së tij fituese. Pra, jo pse ka thirrë seancën, po pse po na humb seancën, me mandatin… pse po e djeg mandatin e deputetëve?”
