Ministri në detyrë i Financave, Punës dhe Transfereve, Hekuran Murati, ka kritikuar Komunën e Prishtinës lidhur me mënyrën e planifikimit të angazhimit të operatorëve privatë për transportin publik, duke pretenduar se nuk janë ndjekur procedurat e parapara me ligj.
Përmes një postimi në rrjetet sociale, Murati ka thënë se ofrimi i shërbimeve publike përmes operatorëve privatë është i mundur, por duhet të realizohet në përputhje me Ligjin për Partneritet Publiko Privat.
“Ofrimi i shërbimeve publike siç është transporti publik, mund të bëhet edhe përmes operatorëve privatë siç po dëshiron ta bëjë Komuna e Prishtinës, mirëpo kjo gjë duhet të bëhet sipas procedurave që parashihen në Ligjin për Partneritet Publiko Privat, për t’u siguruar se paraja publike nuk keqpërdoret”, ka shkruar Murati.
Ai ka akuzuar Komunën e Prishtinës se nuk ka ndjekur procedurat ligjore për këtë proces, duke deklaruar se çdo marrëveshje e lidhur në këtë kuadër është në kundërshtim me ligjin.
“Komuna e Prishtinës nuk ka ndjekur asnjë procedurë që e obligon Ligji në fuqi, prandaj çfarëdo aranzhimi, marrëveshje apo kontrate që është nënshkruar në lidhje me këtë çështje, ajo është në shkelje të plotë të Ligjit për Partneritet Publiko Privat”, ka theksuar ai.
Murati ka kërkuar reagim nga organet e rendit, duke thënë se duhet të ndërhyhet për të parandaluar, siç e ka quajtur ai, keqpërdorimin e parasë publike.
“Organet e rendit do duhej të vepronin sa më parë në lidhje me këtë rast në mënyrë që të parandalohet keqpërdorimi i parasë publike”, ka shtuar Murati.
