Në emisionin “Debat Plus”, të moderuar nga Ermal Panduri, u diskutua për listën e kandidatëve të Aleancës për Ardhmërinë e Kosovës (AAK) për zgjedhjet e ardhshme.
Gjatë debatit, analisti Shaip Kamberi u ndal te kandidati për deputet i AAK-së, Ahmet Isufi, i cili mban numrin 13 në listë. Kamberi e cilësoi Isufin si një figurë të rëndësishme dhe të pazëvendësueshme në skenën politike.
Duke iu drejtuar analistit Sadri Ramabaja, Kamberi e pyeti nëse pajtohej me këtë vlerësim. Ramabaja u përgjigj se ishte “100 për qind” dakord. Më tej, Kamberi shtoi në mënyrë simbolike se mbështetja për Ahmet Isufin do të vazhdojë edhe në të ardhmen, duke deklaruar: “Po edhe unë e ti deri në vitin 2050 kemi me votu”.
Ndërkohë, moderatori Ermal Panduri prezantoi për shikuesit profilin politik dhe familjar të Ahmet Isufit, duke kujtuar kontributin e tij dhe të familjes së tij për çështjen kombëtare.
“Ahmet Isufi, për ata që nuk e njohin, ka qenë shef i Grupit Parlamentar të AAK-së dhe vjen nga një familje që ka dhënë kontribut të madh për vendin. Ai është vëllai i Saime Isufit, bashkëshortes së heroit Kadri Zeka. Vetëm 19 ditë pas martesës së tyre, Kadri Zeka u vra, ndërsa Saime Isufi vazhdoi angazhimin e saj për të drejtat kombëtare dhe për realizimin e idealeve për të cilat veproi Kadri Zeka”, tha Panduri.
