Kandidati i Lidhjes Demokratike të Kosovës (LDK) për kryeministër, Lumir Abdixhiku, ka premtuar 1.5 miliardë euro investime për Prishtinën, duke thënë se kryeqyteti ka qenë i lënë anash dhe i pambështetur nga qeverisja qendrore gjatë viteve të fundit.
Në tubimin zgjedhor në Prishtinë, Abdixhiku tha se LDK-ja ka një program konkret për zhvillimin e kryeqytetit dhe realizimin e projekteve të mëdha infrastrukturore.
“Për pesë vitet e shkuara, sidomos Prishtina, sidomos kryeqyteti, ka qenë i lënë anash, ka qenë i penguar, ka qenë i sabotuar, e mbi të gjitha, i pambështetur nga një qeverisje qendrore. Ne kemi program, kemi mbështetje politike për Prishtinën – plot 1.5 miliardë euro investime për kryeqytetin, që janë projekte madhore për njerëzit tanë, në vendin më të mirë, në qytetin më të bukur në botë”, tha Abdixhiku.
Ai u shpreh se ka ardhur koha që qeverisja qendrore dhe ajo lokale të udhëhiqen nga LDK-ja, në mënyrë që, sipas tij, të realizohen projektet që i nevojiten Prishtinës dhe Kosovës.
“Besoj që është koha, pas shumë vitesh, që përfundimisht qeverisja qendrore dhe qeverisja lokale të jenë të udhëhequra nga Lidhja Demokratike e Kosovës dhe të tregojmë edhe një herë mbarë e mirë se çfarë jemi në gjendje të bëjmë për Prishtinën tonë, për Kosovën tonë”, deklaroi ai.
Abdixhiku tha se programi i LDK-së përmban 113 pika dhe mbështetet nga një ekip prej 110 kandidatësh për deputetë.
“Çfarë jemi në gjendje të bëjmë për Prishtinën tonë e Kosovën tonë, e keni në programin prej 113 pikash dhe me ekipin prej 110 kandidatëve më të mirë që ka pasur Kosova ndonjëherë”, u shpreh ai.
Duke folur për projektet konkrete, Abdixhiku premtoi se në javën e parë të qeverisjes do të zhbllokohet projekti i unazës së kryeqytetit.
“Po përparojmë unazën e ardhshme, unazën e kryeqytetit, që në javën e parë do ta zhbllokojmë e do ta nënshkruajmë mbështetjen financiare për kryeqytet. Prishtinës do t’i vijë unaza e jashtme e kryeqytetit”, tha ai.
Po ashtu, ai premtoi investime në arsim, duke theksuar se Prishtina do të jetë qyteti i parë në Kosovë me mësim tërëditor në të gjitha shkollat.
“Prishtinës do t’i vijë edhe mbështetja financiare për mësimin tërëditor në secilën shkollë të Prishtinës. Fëmijët e Prishtinës do të jenë fëmijët e parë që do të kenë mësim tërëditor në të gjithë territorin e Prishtinës. Pra, 250 milionë euro vetëm për mësimin tërëditor në kryeqytet”, deklaroi Abdixhiku.
Ai përmendi edhe investimet në sport, duke premtuar ndërtimin e një qendre të madhe sportive në Bërnicë dhe rikthimin e stadiumit për Prishtinën.
“Le ta bëjmë qendrën e madhe sportive në Bërnicë – stadiumi i kthehet Prishtinës me Lidhjen Demokratike të Kosovës”, tha Abdixhiku.
