Zgjedhjet për kryetarin e ri të Bashkisë në Dibër do të mbahen më 11 shtator, dhe kjo datë nuk do të ndryshojë pavarësisht kërkesës së Partisë Socialiste për të qenë më larg kësaj dite.
Gjykata Administrative mori këtë të hënë vendimin për ta rrëzuar kërkesën e PS-së, sipas të cilës dekreti i Presidentit Bujar Nishani për datën e zgjedhjeve në Bashkinë e Dibrës duhej të rrëzohej.
Me rrëzimin e kërkesës, dekreti mbetet në fuqi dhe data e zgjedhjeve të pjesshme lokale në Bashkinë e Dibrës është 11 shtatori.
Socialistët pretenduan shkeljen e Kodit Zgjedhor nga kreu i shtetit me argumentin se duhej të kishte pritur që vendimi i Gjykata Kushtetuese që linte në fuqi shkarkimin e Shukri Xhelilit si kryebashkiak i Dibrës, të zbardhej në Fletoren Zyrtare.
Vetë presidenti Nishani argumentoi se dekreti nuk ka asnjë shkelje, pasi data e zgjedhjeve ishte përcaktuar nga vendimi i Gjykatës Kushtetuese.
Kushtetuesja la në fuqi vendimin e Qeverisë që e shkarkoi atë nga detyra menjëherë pas daljes së videoskandalit seksual ku Shukri Xhelili kërkonte të kryente marrëdhënie seksuale me një vajzë 20-vjeçare për t’i siguruar më tej një vend pune në bashki.
/Gazeta Express/
