Ministri i Drejtësisë i Turqisë, Bekir Bozdag, bëri të ditur se dhjetë persona janë vrarë nga shpërthimet në aeroportin Ataturk të Stambollit.
“Dhjetë persona kanë humbur jetën në bazë të vlerësimeve të para”, tha Bozdag.
Sipas zyrtarëve, dy sulmues kanë hedhur veten në erë.
Dëshmitarët thonë se janë dëgjuar edhe të shtëna me armë zjarri.
Agjencia Reuters citon dëshmitarë të kenë thënë se persona të armatosur kanë shtënë nga vendparkimi i aeroportit.
Pamjet televizve tregojnë auto-ambulanca dhe taksi duke bartur të plagosur nga aeroporti.
Ataturku është aeroporti më i madh dhe më i ngarkuar në Turqi.
Në muajin dhjetor, një shpërthim në pistën e aeroportit tjetër të Stambollit, Sabiha Gokcen, ka vrarë një punonjës pastrimi.
Dhuna në Turqi është rritur prejse armëpushimi midis shtetit dhe militantëve kurdë ka kolapsuar në korrik të vitit 2015.
Për disa sulme me bomba atje e kanë marrë përgjegjësinë edhe militantët e të ashtuquajturit Shtet Islamik.
Turqia është pjesë e koalicionit të udhëhequr nga Shtetet e Bashkuara, që lufton Shtetin Islamik në Siri dhe Irak, transmeton rel.
Një paralajmërim i Departamentit amerikan të Shtetit për Turqinë, i publikuar fillimisht në muajin mars dhe i përditësuar të hënën, u bën thirrje shtetasve amerikanë “të ushtrojnë vigjilencë dhe kujdes të shtuar kur vizitojnë zona me qasje publike, sidomos ato që frekuentohen shumë nga turistët”.
