Ministri i Punës dhe Mirëqenies Sociale, Arban Abrashi premton se nuk do të ketë shkurtim të pushimit të lehonisë në Kosovë, raporton lajmi.net
Ai bënë të ditur se ka pasur propozime nga grupe të ndryshme të interesit, veçanërisht të sektorit privat, që janë edhe punëdhënësi më i madh në vend, që të ndryshohet pushimi i lehonisë për shkak të ngarkesës buxhetore të tyre.
Në një intervistë për lajmi.net, Abrashi thotë se janë të gatshëm që të marrin përsipër si Qeveri edhe një muaj e gjysmë më shumë të pagesës së pushimit të lehonisë, vetëm që të mos dëmtohen nënat në Kosovë.
Thotë se kjo nuk do të jetë ngarkesë buxhetore për Qeverinë, madje sipas tij, do të tentojnë që kjo të paguhet edhe më shumë.
“Katër muaj e gjysmë pritet që të jetë pagesa nga punëdhënësi, katër e gjysmë nga Qeveria, dhe tre të tjerë pa pagesë. Aktualisht është që gjashtë muaj paguhet nga punëdhënësi, tre nga Qeveria dhe tre të tjerë mund të merren pa pagesë. Edhe në Këshillin Ekonomik Social e edhe ne si Qeveri kemi një konsensus që të marrim barrën përsipër me katër muaj e gjysmë, pra të lirohet barra e punëdhënësve, e sektorit privat në këtë rast”, thotë Abrashi për lajmi.net
Ministri thotë se si Qeveri nuk e kanë diskutuar asnjë çast shkurtimin e pushimit por disa grupe tjera e kanë diskutuar këtë.
Abrashi shpjegon se metoda që të paguhen katër muaj e gjysmë nga Qeveria nuk ka ndonjë kosto të lartë dhe do të jetë shumë lehtë e përballueshme.
“Në Qeveri asnjëherë nuk është diskutuar shkurtimi i pushimit të lehonisë, por është diskutuar shkurtimi i barrës financiare të sektorit privat”
Në këto propozim ndryshim është diskutuar edhe për nënat që lindin binjak, trinjak apo më shumë, dhe beneficionet që ato do të ketë, me qëllimin që të përfitojnë më shumë se nënat që lindin nga një fëmije.
“Fillimi çka mund të bëjmë është që të marrim përsipër pagesën për një muaj e gjysmë më shumë nga Qeveria, do të shohim edhe mundësi të tjera që të lehtësojmë sepse ideja themelore është që të krijojmë ambient sa më të mirë të të bërit biznes, njëkohësisht duhet lehtësuar barrën e tyre sa i përket lehonisë që të kemi një punësim sa më të madh të grave në Kosovë”, thotë Abrashi.
Beson se pas diskutimeve dhe propozimeve, do të rregullohet gjithçka, nuk do të ketë shkurtim të pushimit të lehonisë, por si Qeveri dhe Këshilli Ekonomik Social për do të merren me çështjet teknike , e nënat në Kosovë nuk akne pse brengosen me asgjë.
Ndryshe, Ligji i Punës këtë vit është futur në plotësim-ndryshim sipas agjendës legjislative. Tërë kjo do merr disa muaj kohë dhe nuk besohet të kompletohet deri të paktën në muajin nëntor të këtij viti.
