Kryeministri i Republikës së Kosovës, Isa Mustafa, ka pritur në një takim përfaqësuesit e shteteve të Kuintit në Kosovë, nga të cilët ka kërkuar përkrahjen në procesin e liberalizimit të vizave dhe proceseve të tjera integruese në BE..

Siç njofton komunikata, gjatë takimit, ku ishte i pranishëm edhe ministri i Integrimit Evropian, Bekim Çollaku, kryeministri Mustafa theksoi progresin e shumanshëm që po arrihet në Kosovë.

Kryeministri Mustafa, po ashtu, i ka njoftuar ambasadorët dhe përfaqësuesit e tjerë për fokusimin e plotë të Qeverisë së Kosovës në zhvillimin ekonomik dhe në proceset integruese evropiane.

Ndërkaq, duke iu referuar hyrjes në fuqi të MSA-së, kryeministri Mustafa theksoi faktin se Qeveria dhe qytetarët e Kosovës presin vendimin e BE-së për rekomandimin e datës për liberalizimin e vizave, duke pas parasysh se tashmë janë përmbushur të gjitha kriteret dhe rekomandimet për këtë proces.

“Liberalizimi i merituar i vizave për Kosovën është shumë i rëndësishëm edhe për implementimin adekuat të MSA-së, pasi që kjo do të mundësonte qarkullimin e lirë të ndërmarrësve dhe të bizneseve k osovare në vendet e BE-së, si parakusht për shkëmbimin e mallrave dhe ideve”, citohet të ketë thënë kryeministri.

Me këtë rast, njofton Zyra e Kryeministrit, kryeministri Mustafa ka kërkuar përkrahjen e vendeve të Kuintit për liberalizimin e vizave dhe për proceset e tjera integruese evropiane, si dhe për zhvillimet e tjera në Kosovë.

Ndërsa, përfaqësuesit e vendeve të Kuinit vlerësuan progresin e arritur në Kosovë, duke shprehur përkrahjen e vendeve të tyre në proceset integruese evropiane dhe aspektet tjera.