Kryeministri i Republikës së Kosovës, Isa Mustafa, mori pjesë në ceremoninë e përmbylljes së projektit “More Quality Domestic Cheese for the Domestic Market” të zbatuar nga korporata “Rugove” në fabrikën “Djath Rugove” në Drelaj të Rugovës, projekt i financuar nga Zyra e BE-së në Kosovë.
Kryeministri Mustafa vlerësoi rëndësinë e projekteve të tilla, të cilat ndihmojnë jo vetëm në zhvillimin e vendit, por edhe në rritjen e cilësisë së jetës në këto anë.
“Projekte të tilla mund të bëjnë vetëm njerëzit që kanë dëshirë, kanë vullnet, kanë përvojë, ata që dëshirojnë t’i ruajnë dhe të jetojnë në këto anë dhe ata që dëshirojnë t’i kontribuojnë zhvillimit të prodhimit dhe zhvillimit të vendit”, tha kryeministri.
Duke vlerësuar këtë investim dhe investimin e fabrikës së kontrollimit të ujit të Rugovës, si dy marka të rëndësishme për Kosovën, kryeministri Mustafa tha se djathi i Rugovës do të jetë në tryezat e Kosovës por edhe në tryezat evropiane dhe botërore.
“Rugova pastaj nuk do të jetë vetëm në Rugovë do të jetë në Ballkan, në Evropë dhe do të jetë në gjithë tregun botëror. Ky emër e meriton që të arrijë atje ku duhet të arrijë”, tha kryeministri, duke uruar që këso fabrika të përurohen sa më shumë.
“Ky është qëllimi ynë themelor, që të bëjmë fabrika, të punësojmë njerëz, të prodhojmë vetë produktet tona, të ekspertojmë jashtë dhe të tregojmë se Kosova është një vend i cili e meriton pavarësinë, Kosova është një vend i cili di ta zhvillojë ekonominë dhe Kosova është një vend i orientuar kah Evropa dhe kah tregu evropian”, tha kryeministri Isa Mustafa.
Shefi i zyrës së BE-sëPërfaqësuesi Special i BE-së, Samuel Zhbogar, tha se ky projekt ka ndikuar në komunitetin lokal, duke krijuar vende të reja të punës, duke rritur kualitetin e jetës në fshatin Drelaj, por edhe duke mbështetur ekonominë.
“E uroj kompaninë Rugova për implementim të suksesshëm të projektit në vlerë prej 387 mijë euro, e cila është dhënë përmes skemës së granteve rurale të BE-së. Në total, deri më tash, ne kemi kontribuar me 24.5 milionë euro për projektet që kanë të bëjnë me bizneset bujqësore dhe zhvillimin rural. Kjo është posaçërisht e rëndësishme në kontekst të Marrëveshjes së Stabilizim Asociimit, e cila hyri në fuqi të premten e kaluar, si një mjet kyç për të mundësuar kushtet për tërheqjen e investimeve dhe krijimin e vendeve të reja të punës në Kosovë”, tha Zhbogar.
Kryetari i Pejës, Gazmend Muhaxheri, tha se këto rezultate dhe këto prodhime janë një shembull me të cilin mburret Komuna e Pejës.
“Besojmë se ky shembull nuk do të jetë i vetëm dhe se edhe të tjerët do të ndjekin shembullin e Visarit, të marrin përgjegjësi në krijimin e vendeve të reja të punës dhe zhvillimin e Komunës së Pejës, por edhe të vetë Republikës”, tha Muhaxheri.
Visar Kelmendi, përfaqësues i Kompanisë Rugove, tha se shembulli i Rugovës dhe fabrikave anëtare të klubit, po tregon mundësitë që ekzistojnë për të arritur sukses në Kosovë.
“Mendoj që efektet e këtij investimi do të shihen realisht tek vitin e ardhshëm, dhe aty do të shihet se gjithë kjo do të multiplikohet shumë më shumë, për arsye se Rugova po i kthehet gradualisht blegtorisë, asaj prej të cilës ka jetuar. Këto investime tonat po tregojnë që rruga është kjo, dhe ne e vazhdojmë këtë rrugë”, tha Kelmendi.
Besart Shatri, menaxher i projektit foli për rezultatet e shumanshme që janë arritur falë implementimit të këtij projekti të rëndësishëm.
