Ka filluar sot zbatimi i Marrëveshjes së Kosovës dhe BE-së të Stabilizim Asociimit, MSA.
Me këtë rast kryeministri i Kosovës, Isa Mustafa ka thënë se ky është një kapitull i ri i zhvillimit për Kosovën, dhe njëherësh kjo do të jetë një ditë e shënuar për Kosovën, raportojnë gazetarë të grupit KOHA.
“Sot për Republikën e Kosovës po fillon një kapitull i ri i zhvillimit, pas nënshkrimit të marrëveshjes për Stabilizim dhe Asociim më 27 tetor të vitit të kaluar, sot Kosova po kalon një fazë tjetër të zhvillimit politik, social dhe ekonomik. Në këtë moment zyrtarisht po fillojmë ta implementojmë MSA-në prandaj kjo ditë është e shumë pritur për ne dhe do të jetë ditë e shënuar në historinë e zhvillimit të Kosovës”, ka thënë Mustafa.
Ai më tutje ka thënë se, “Kosova po vë gur themelin e marrëdhënieve kontraktuale më Bashkimin Evropian, që kushtëzon të drejtat dhe obligimet reciproke në një spektër të gjerë të sektorëve, duke përfshirë respektimin e parimeve demokratike, aplikimin e standardeve evropiane të tregut, të konkurrencës, shtetin ligjor dhe pronën e përgjithshme dhe atë intelektuale”.
Sipas tij nga sot do të hiqen barrierat kufizore në sasi dhe vlerë sa i përket tarifave doganore. Pra kompanitë kosovare do të mund të eksportojnë produktet e tyre me shpenzime shumë më të ulëta, krahasuar me shpenzimet më të cilat kanë operuar deri më tani dhe pa barrierë administrative.
“Kam arsye të shpresoj që pas përmbushjes së suksesshme të kritereve dhe rekomandimeve që janë kërkuar nga ne për liberalizimin e vizave së shpejti edhe këtij akti do t’i vije zbatimi ashtu siç i erdh MSA-së”, është shprehur Mustafa.
Ai ka thënë se po pret që po në këtë formë pozitive të jetë edhe vendimi për liberalizim të vizave. Drejtori i Doganave, Lulzim Rafuna ka deklaruar se stafi është i përgatitur dhe i gatshëm që të aplikoj çdo pikë të kësaj marrëveshje. Ndërsa, kryetari i Odës Ekonomike të Kosovës, Safet Gërxhaliu ka thënë se me këtë marrëveshje pret që të gjitha bizneset kosovare ta shfrytëzojnë për të eksportuar në tregun prej 500 milionë banorësh.
Në të njëjtën ditë në mënyrë simbolike nga objekti i Doganave të Kosovës janë nisur 5 kamionë drejt vendeve evropiane.
