Kryesia e Bashkimit Demokratik për Integrim, të enjten vonë, ka vendosur të tërheqë të gjithë zyrtarët e saj aktual nga pushteti ekzekutiv i Republikës sē Maqedonisë.
Në njoftimin e BDI-së nuk jepen arsyet për këtë vendim, por në komunikatë thuhet se “në ditët në vijim do të rishqyrtohen politikat e saj”.
Kryesia e partisë, siç thuhet në njoftim, ka autorizuar kryetarin, Ali Ahmeti, “për të vendosur mbi hapat e mëtutjeshëm të Bashkimit Demokratik për Integrim”.
Bashkimi Demokratik për Integrim ka 5 poste ministrore në qeverinë teknike që drejtohet nga Emil Dimitriev, i cili ka zëvëndësuar në këtë post kreun e VMRO-DPMNE-së, Nikolla Gruevskin.
Dorëheqja e ministrave të partisë së Ahmtetit vjen në kohën e publikimit në media dhe rrjetet sociale të një bisede të përgjuar me përmbajtje erotike mes dy zyrtarëve të lartë të kësaj partie.
Biseda ka nxitur reagime të shumta në opinion, madje edhe në vet partinë, BDI. Nuk ka informacione nëse pikërisht ky skandal ka qenë shkaku i vendimit të Kryesisë partiake.
Ndryshe, zgjedhjet e parakohshme parlamentare në Maqedoni duhet të mbahen më 5 qershor, ndërsa paraprakisht, më 7 prill, hyn në fuqi vendimi për shpërndarjen e Kuvendit, transmeton rel.
Zgjedhjet janë rezultat i marrëveshjes mes katër partive kryesore politike për t’i dhënë fund krizës politike, e cila është shkaktuar nga ajo që njihet si aferë e përgjimeve, e publikuar nga opozita, e cila pretendon përfshirjen e zyrtarëve më të lartë në afera të shumta kriminale.
