Deputetja e Vetëvendosje!-s, Albulena Haxhiu, ka reaguar në lidhje me ‘Pallatin e Drejtësisë’, duke i cilësuar si të papërgjegjsgëm Kryeministrin Isa Mustafa dhe Ministrin e Drejtësisë, Hajredin Kuqi, për rrezikimin e vazhdueshëm të jetës së punonjësve brenda këtij objekti.
Deputetja e VV-së ka përmendur shumën prej 31 milionë euro të shpenzuar për objektin në fjalë, si dhe vetëlavdërimin e Mustafës e Kuçit për ndërtimin e këtij objekti, i cili vazhdimisht ka pasur dëmtime, madje me rrezik për punonjësit brenda këtij institucioni.
Në fund, deputetja Haxhiu e ka cilësuar ministrin Kuçi si ministrin më dështak.
Postimi i plotë i deputetes Haxhiu:
U thurren shumë lavde për ndërtimin e pallatit të drejtësisë nga Mustafa, Kuçi dhe të tjerë.
Aq shumë folën dhe u mburren në ditën e inaugurimit të tij. U shpenzuan hiq më pak se 31 milion euro! Sot kur po rrezikohet jeta e punonjësve në pallatin e drejtësisë askush nuk po jep përgjegjësi. As Mustafa por as Kuçi i cili po e përfundon mandatin e tij me një varg të metash në sistemin e drejtësisë dhe i cili do të mbahet mend si ministri më i dështuar dhe më problematik!
