Analistët politikë, kanë vlerësuar se lidhja mes partive opozitare po shkon duke u zbehur.
Sipas tyre, këto parti mund të kenë interesa krejt të ndryshme dhe anulimi i protestës së nesërme, mund të ketë ardhur si pasojë e dështimit të protestave të mëparshme. Tutje, gjendjen në të cilën ndodhet Republika e Kosovës, ata e kanë cilësuar si të rrezikshme dhe të jashtëzakonshme.
Njohësi i çështjeve politike Donik Sallova, ka thënë për Gazetën Blic, se ekzistojnë disa faktorë pse partitë opozitare mund të kenë dështuar në protestat e mëparshme.
“Me shumë gjasë opozita ka dështuar në organizimin e protestës në nivel të dy protestave paraprake. Kjo gjë mund të ketë ardhur si pasojë e disa faktorëve. Faktori kryesor ndoshta është “lëvizja” që pritet të ndodhë brenda koalicionit qeveritar”, ka deklaruar ai.
Sipas tij, lidhja mes partive opozitare po vjen duke zbehur, që prej momentit kur dy partitë opozitarë (AAK dhe NISMA) e braktisën kuvendin. Sallova tutje gjatë bisedës, ka thënë se tanimë ka nisur një “luftë për ndikim” midis opozitës.
“Mund të themi që mosuniteti i opozitës po thellohet, duke u nisur nga fakti që aktit të braktisjes së Kuvendit nga AAK dhe Nisma, nuk iu bashkangjit VV-ja. Pra, tani mund të themi ka filluar lufta për influencë brenda opoziteës. Njëra anë do ketë prirje për bashkëpunim me pushtetin (AAK dhe NISMA) dhe tjetra do të vazhdojë me refuzim (VV)”, ka shtuar tutje Sallova.
Dalja nga kriza do të ndërlidhet me zgjedhjen e Kadri Veselit
Ndërsa, analisti politik Haki Abazi, ka thënë për Gazetën Blic, se nuk është e logjikshme të ndalemi vetëm te partitë opozitare, kur siç është shprehur ai, dështimet e qeverisë janë të vazhdueshme.
“Me situatën e krijuar nuk është lehtë të krijohet koncensus, është vështirë të kërkohet një gjë e tillë. Është presion i palogjikshëm të fokusohemi tek opozita, përderisa ka dështime të njëpasnjëshme të koalicionit qeverisës”, ka deklaruar Abazi.
Përkundër kësaj, ai ka vlerësuar se synimet e partive opozitare mund të mos jenë të njëjta.
“Interesat dhe prioritet e partive opozitare mund të jenë të ndryshme dhe ato po përballen me presione të fuqishme nga të gjitha anët, përfshirë edhe faktorë ndërkombëtarë, që për qëllim kane stabilitetin dhe jo zhvillimin progresiv të vendit”, ka shtuar tutje Haki Abazi.
Nga ana tjetër, analisti Donik Sallova, ka thënë se mundësia për të dalë nga kriza e tanishme, lidhet edhe me zgjedhjen e kryeparlamentarit Kadri Veseli, në krye të Partisë Demokratike të Kosovës.
“Dalja nga kriza do të lidhet shumë me zgjedhjen e Kadri Veselit kryetar të PDK-se dhe rolit që PDK-ja do ta marrë për t’i tejkaluar pengesat në raport me opozitën, veçanerisht AAK-në dhe NISMA-n”, ka vlerësuar ai.
E krejt në fund, analisti politik Haki Abazi, e ka cilësuar si të rrezikshme situatën në të cilën ndodhet Kosova momentalisht. E për këtë, ai ka fajësuar koalicionin qeverisës dhe “lidershipin”.
“Kjo është situatë shumë e rrezikshme dhe e jashtëzakonshme dhe me pasoja shumë të mëdha për vendin. Koalicioni dhe lidershipi mban përgjegjësinë e madhe nëse është duke vazhduar me dhunimin e kushtetutës dhe ligjeve të Kosovës.
Opozita kishte paralajmëruar që protesta e radhës të mbahej ditën e nesërme (më 26 mars), mirëpo gjatë ditës së sotme, pas një takimi që patën të tre liderët opozitarë, Visar Ymeri, Ramush Haradinaj dhe Fatmir Limaj, protesta në fjalë u anulua.
Gjatë kësaj dite po ashtu, pati edhe kundërshtime mes partive opozitare. Vetëvendosje njoftoi mediat se konferenca e opozitës, e cila pritej të mbahej sot në orën 14:00, ishte anuluar, ndërsa AAK-ja për Gazetën Blic, e pohoi të kundërtën, duke thënë se konferenca do të mbahej. /GazetaBlic/
