Shefi i Zyrës për Kosovën në Qeverinë e Serbisë Marko Gjuriq ka bërë me dije se raundi i bisedimeve në nivel ekspertësh i planifikuar që të mbahej sot në Bruksel në kuadër të dialogut Prishtinë-Beograd është shtyrë.
Gjuriq në një postim në Twitter ka shkruar se delegacioni serb do të dëshironte të shkonte në selinë e Bashkimit Evropian dhe të solidarizohej me kolegët, por një gjë e tillë nuk ishte e mundur fizikisht.
“Ekstremizmi nuk njeh kufij dhe Evropa duhet të luftojë kundër së keqes së përbashkët”, ka thënë Gjuriq.
Ndërkaq, edhe ministrja për Dialog, Edita Tahiri, e cila poashtu ndodhet në Bruksel për të marrë pjesë në takimin e parë të grupit punues për diplomat dhe kadastrat i cili edhe u anualua ka konfirmuar se bashkë me ekipin e saj janë shëndoshë e mirë dhe ndodhen në një vend të sigurt.
Të paktën tre shpërthime tronditën në një kohë të shkurtër sot herët në mëngjes Brukselin me ç`rast vdiqën 34 persona dhe mbi 190 të tjerë mbetën të plagosur.
