Në cilësinë e Kryetarit të Delegacionit të Shqipërisë, deputeti i PS-së Taulant Balla ka folur në Komisionin e Politikës së Jashtme të Parlamentin Evropian gjatë takimit të Asamblesë së Përgjithshme të PE-së, ku tha se është shumë e rëndësishme që BE të jap dritën e gjelbër për liberalizmin e vizave për Kosovën.

“Në emër të Asamblesë Parlamentare të SEECP jemi këtu sot për t’i kërkuar Parlamentit Evropian t’i propozojë Komisionit dhe Këshillit heqjen e regjimit te vizave për qytetarët e Kosovës. Kosova i ka përmbushur tashmë kriteret kryesore, ndërsa numri i azil-kërkuesve nga Kosova ka rënë ndjeshëm në muajt e fundit. Është e papranueshme që Kosova të vazhdojë të jetë një gardh i rrethuar me gjemba ne mes te Evropës”, ka thënë Balla.

Më pas Komisioni i Politikes së Jashtme të Parlamentit Evropian diskutoi draftin përfundimtar të Rezolutës për Shqipërinë, në të cilën mesazhi kryesor është miratimi sa me shpejt i pakos së Reformës në Drejtësi.

“Në paragrafin 5, të dakordësuar ndërmjet dy grupeve me të mëdha PPE dhe S&D, përkatësisht ndërmjet eurodeputeteve Kukan dhe Fleckenstein, i kërkohet Komisionit Evropian që me miratimin dhe fillimin e implementimit të Reformës në Drejtësi të konsiderojë propozimin e hapjes se negociatave për anëtarësim. Nesër, projekt-rezoluta do të votohet në seancën plenare të Komisionit të Politikës së Jashtme të PE”, ka thënë Balla.