Presidentja e Kosovës, Atifete Jahjaga, ka pritur sot në takim Eve-Kulli Kala, ambasadore e Republikës së Estonisë në Vjenë, jorezidente për Kosovën.
Jahjaga me ambasadoren Kulli Kala biseduan për marrëdhëniet midis dy vendeve, zhvillimet në vendin tonë, si dhe për agjendën evropiane të Kosovës, pas nënshkrimit të Marrëveshjes së Stabilizim Asociimit me Bashkimin Evropian, si dhe për procesin e liberalizimit të vizave.
Presidentja e ka falënderuar ambasadoren Kulli Kala për mbështetjen që Estonia i ka dhënë institucioneve të Kosovës dhe vlerësoi marrëdhëniet dhe bashkëpunimin ndërmjet Republikës së Kosovës dhe Republikës së Estonisë, duke shprehur përkushtimin e saj për thellimin e bashkëpunimit në çdo fushë me interes dypalësh.
Ndërkaq, ambasadorja e Estonisë në Vjenë, jorezidente për Kosovën, zonja Eve-Kulli Kala, shprehu mbështetje e vendit të saj për proceset integruese të Kosovës drejt Bashkimit Evropian, si dhe vendosmërinë për të thelluar bashkëpunimin me Republikën e Kosovës në çdo fushë me interes të përbashkët.
