Aleanca për Ardhmërinë e Kosovës, përmes një komunikatë për media ka kërkuar nga Kryeministri i Kosovës, Isa Mustafa të tregojë se kush janë sulmuesit e Presidencës.
“Sigurisht se Kryeministri i Kosovës është i vetmi kryeministër në Botë, që nuk e ka problem të shndërrohet edhe në prokuror, edhe në polic edhe në gjyqtar. Qeveria që ai kryeson, por edhe partia e tij, janë të vetmet që i dinë sulmuesit e akteve kriminale, siç ishte edhe ky i sotmi në ndërtesën e Presidentes, ende pa u identifikuar as policia!”, thuhet në komunikatën e AAK-së.
Është detyrë e kryeministrit dhe e partisë së tij, thuhet më tej nga AAK, që informatat t’i çojnë në polici e jo ta helmojnë opinionin me lloj-lloj hipotezash, duke shtuar se ndërtesa e Presidentes mbikqyret me kamera dhe ruhet 24 orë nga policia dhe sigurimi i ndërtesës, prandaj edhe nuk do të duhej të ishte vështirë të zbuloheshin sulmuesit, transmeton infosot.
AAK thotë se nuk po e drejton gishtin as nga LDK e as nga PDK, si autorë të mundshëm të këtij sulmi, pavarësisht dyshimeve që po i ngrehin të tjerët.
“Prandaj as Qeveria e as LDK-ja, nuk duhet ta luajnë rolin e viktimës sa herë që ndodhin sulme të tilla! Ata duhet të ndihmojnë në zbardhjen e rastit, nëse kjo nuk iu shkakton dëm atyre, e jo të merren me teori konspirative”, shkruan AAK, teksa vazhdon më tej duke thënë se “Nuk është në natyrën e AAK-së, të merret me punë të pista e me sulme të dyshimta, por ajo është e vendosur t’a luftojë këtë keqqeverisje e cila tashmë është identifikuar edhe si shkelëse e Kushtetutës. Prandaj Qeveria dhe Kryeministri, është më mirë të merren me gabimet e veta e ta sqarojnë popullin, se sa ta luajnë rolin e viktimës e të trillojë kërcënime të paqena nga intervistat televizive”.
Veprimet AAK-së janë publike e jo pas shpine, dhe ato i kemi manifestuar në vazhdimësi, siç do të bëjmë edhe me 26 mars, aty ku do të jemi të gjithë, thuhet në fund të komunikatës së AAK-së.
