Nisma për Kosovën ka hequr dorë nga përdorimi i gazit lotsjellës në Kuvendin e Kosovës. Këtë e ka konfirmuar në emisionin “Kontakt” me Valdrin Krasniqin në Tribuna Channel, anëtari i Kryesisë së kësaj partie, Bajram Hasani.

“Ne NISMA për Kosovën mendojmë se më nuk mund të vazhdojmë me metoda të njëjta, sidomos të hedhjes së gazit lotsjellës në Kuvendin e Kosovës. Ne duhet të protestojmë dhe ta kundërshtojmë këtë qeverisje dhe duhet të insistojmë që të shkojmë sa më shpejt në zgjedhje të parakohshme. Gazi lotsjellës i ka arritur efektet pasi që e kemi përdorur si mjet politik për t’i kundërshtuar marrëveshjet dhe tani duhet t’i ndërrojmë pozicionet nga hedhja e gazit lotsjellës”, ka thënë Hasani në “Kontakt”.

Ai ka folur edhe për seancën e zgjedhjes së presidentit të ri të Republikës.

“Zgjedhja e Presidentit me 26 shkurt është bërë nën masa të dhunshme policore, si brenda ashtu edhe jashtë Kuvendit. Ne si opozitë kemi kërkuar vazhdimisht që zgjedhja e Presidentit të bëhet me votën e popullit dhe të ndryshohet Kushtetuta”, ka thënë ai, duke shtuar se ky president nuk mund të jetë unifikues sepse ka nxjerrë zvarrë deputetët si dhe e ka injoruar vazhdimisht opozitën.

Ai beson se Gjykata Kushtetuese do ta thotë të drejtën dhe do ta shfuqizojë vendimin e 26 shkurtit për ta zgjidhur krizën politike në vend.

“Kuvendi i Kosovës ka humbur legjitimitetin duke u bazuar në shkelje të Kushtetutës dhe si ky Kuvend nuk ka pasur legjitimitet që ta votojë Presidentin”, ka thënë ai.

Hasani ka folur edhe për organizimin e protestës së radhës nga opozita me 26 mars di dhe për shtrirjen e Nisma për Kosovën nëpër degë dhe nëndegë të ndryshme në gjithë vendin./Tribuna/