Në fshatin Luzhak të komunës së Shtimes, të enjten, ka ndodhur një plagosje e rëndë me sëpatë në kokë midis dy bashkëfshatarëve.
Nga lëndimet e marra me sëpatë në kokë Shyqeri Bajraktari nga fshati Luzhak është dashur të kërkojë ndihmë mjekësore në emergjencën e Shtimes e më pastaj është dërguar për trajtim të mëtejmë në QKUK.
Ardiana Isufaj, mjeke kujdestare në emergjencën e QKMF-së në Shtime ka thënë për Kohën Ditore se të lënduarin e kishin sjellë bashkëfshatarët e tij për ta marrë ndihmën e parë si pasojë e plagëve të marra nga një bashkëfshatar tjetër me sëpatë në kokë.
“I lënduari Shyqeri Bajraktari ka arritur në emergjencë me vetëdije por shumë i lodhur përderisa kishte marrë lëndime shumë të rënda në pjesën e përparme të kokë nga sëpatë e dorës. Mjekët kujdestarë ua kemi dhënë ndihmën e parë dhe menjëherë e kemi dërguar me ambulancë për QKUK për trajtim të mëtejmë”, ka thënë Isufaj.
Ndërkaq, një banor nga ky fshat me kusht që mos t’i përmendej emri në gazetë ka thënë se personi i lënduar dhe një bashkëfshatar tjetër kishin pasur probleme pronësore.
“Deri te kjo përleshje ka ardhur si pasojë e një zënke në mes të dy bashkëfshatravëve për çështje pronësore. Realisht është për të ardhur keq të ndodhin gjëra të tilla përderisa kanë mundur t’i rregullojnë me marrëveshje pa ardhur deri te më e keqja”, ka thënë ky burim.
Nga ana tjetër rastin e ka konfirmuar edhe zëdhënësi i Policisë për rajonin e Ferizajt Agim Gashi. Sipas tij në Fshatin Luzhak të komunës së Shtimes rreth orës 14:00 ka marrë lëndime trupore me sëpatë në kokë një person nga bashkëfshatari i tij. “I dyshuari tashmë është arrestuar nga Policia, andaj hetimet janë duke vazhduar, ndërkaq pritet që Policia të dalë me komunikatë për media rreth kësaj çështje”, ka thënë Gashi.
