Presidentja në shkuarje e Kosovës, Atifete Jahjaga, i ka propozuar Kuvendit të Kosovës, që në postin e Auditorit të Përgjithshëm të emërohet Besnik Osmani.

Këtë vendim Jahjaga e ka marr sot të cilin e ka publikuar edhe në profilin e saj në Facebook. Këtë vendim, sipas njoftimit, thuhet se Jahjaga e ka marr duke u bazuar në kompetencat e saja ligjore, transmeton lajmi.net

Përveç Osmanit, në garë kanë qenë edhe dy kandidatë tjerë, që Jahjagës i janë propozuar nga komisioni i përbërë nga një përfaqësues të Presidencës, Kuvendit, BQK-së, Universitetit të Prishtinës dhe shoqërisë civile, dhe me vëzhgues nga Sindikata e AP-së dhe nga Zyra e BE-së në Kosovë

Ja njoftimi i plotë:

Presidentja e Republikës së Kosovës, znj. Atifete Jahjaga, bazuar në nenin 136 paragrafi 3 të Kushtetutës së Republikës së Kosovës, në Ligjin Nr. 03/L-075, për Themelimin e Zyrës së Auditorit të Përgjithshëm të Kosovës, Dekretin për Kriteret dhe Procedurat për Përzgjedhjen e Kandidatit për të Propozuar për Auditor të Përgjithshëm në Kuvendin e Kosovës, si dhe duke marrë parasysh raportin e Komisionit përzgjedhës për shqyrtimin, vlerësimin e aplikacioneve dhe intervistimin e kandidatëve potencialë për Auditor të Përgjithshëm të themeluar me vendimin e datës 16 dhjetor 2015, i ka propozuar Kuvendit të Republikës së Kosovës z. Besnik Osmani kandidat për Auditor të Përgjithshëm të Republikës së Kosovës.

Komisioni i përbërë nga një përfaqësues të Presidencës, Kuvendit, BQK-së, Universitetit të Prishtinës dhe shoqërisë civile, dhe me vëzhgues nga Sindikata e AP-së dhe nga Zyra e BE-së në Kosovë, pas një procesi transparent të konkurrimit dhe intervistave, i ka propozuar Presidentes Jahjaga tre kandidatë për auditor të përgjithshëm.