Shkuarja e Hashim Thaçit në Presidencë dhe lënia vakante e dy pozitave të rëndësishme në kabinetin qeveritar Mustafa, ka bërë që dy partnerët e koalicionit PDK- LDK të fillojnë diskutimet për ndryshime, gjegjësisht për formatizim të Qeverisë.
Gazeta Blic nga burime brenda koalicionit ka marrë vesh se riformatizimi pritet të ndodh pas datës 7 mars, gjegjësisht pas betimit që do ta bëjë, presidenti i ri i vendit, Hashim Thaçi para deputetëve të Kuvendit të Kosovës.
Është mësuar edhe emrat se kush do të vij e kush do të shkoj nga kabineti qeveritar Mustafa.
Postin e zëvendëskryeministrit, të cilën deri dje e mbante Hashim Thaçi, mund ta zërë nënkryetari i PDK-së, Enver Hoxhaj. Ndërkaq, si opsion tjetër për ish- ministrin e Punëve të Jashtme, po përmendet edhe ministria e Integrimeve Evropiane, nëse ministri i deritanishëm, Bekim Çollaku do t’i bashkohet Hashim Thaçit në Presidencë.
“Hashim Thaçi bashkëpunëtorin më të ngushtë tash e 16 vjet e ka Bekim Çollakun. Ka gjasa që Çollaku t’i bashkohet Thaçit në Presidencë, dhe në vend të tij të vijë Hoxhaj”, ka thënë ky burim i Gazetës Blic.
Ndërkaq, në postin e ministrit të Punëve të Jashtme të vij zëvendëskryeministri i deritashëm nga radhët e LDK-së, njëherësh ministri i Kulturës, Kujtim Shala. Ndërkaq, këto burime bëjnë të ditur se në vend të tij, në postin e Ministrisë së Kulturës, Rinisë, Sporteve dhe Çështjeve Jorezidente, të vij zëvendësi i Hashim Thaçit, Petrit Selimi.
Rokadë mund të bëhet edhe me ministrin e Bujqësisë, Pylltarisë dhe Zhvillimit Rural, Memli Krasniqi. Merret vesh se Memli Krasniqi mund të kaloj në krye të Ministrisë së Ministrisë së Punëve të Brendshme, pozitë të cilën tani e mban Skender Hyseni i LDK-së.
“Ministria e Brendshme, që e mban LDK ka gjasa t’i kaloj PDK-së, derisa të Jashtmen ta marrë LDK”, thonë këto burime.
Ndërkaq, ka gjasa që për shkak të dështimeve të shumta, ministri i Arsimit, Shkencës dhe Teknologjisë, Arsim Bajrami të shkarkohet nga ky post. /Blic/
