Zëvendësministri i Punëve të Jashtme të Republikës së Kosovës priti sot në takim sekretaren e shtetit për Zhvillim dhe Bashkëpunim në Ministrinë e Punëve të Jashtme të Mbretërisë së Suedisë, Ulrika Modéer.
Selimi falënderoi sekretaren Modéer për mbështetjen që Suedia i ka dhënë Kosovës në rrugëtimin e saj drejt integrimit evropian si dhe në rrafshin ekonomik. Ai theksoi punën e shkëlqyer të Agjencisë Suedeze për Zhvillim dhe Bashkëpunim Ndërkombëtar (SIDA). Më tej, zëvendësministri Selimi tha se e mirëpret mbështetjen e vazhdueshme të Suedisë në realizimin e prioriteteve të politikës së jashtme, duke përfshirë edhe liberalizimin e vizave dhe forcimin e subjektivitetit ndërkombëtar të Kosovës.
Zëvendësministri Selimi dhe sekretarja Modéer shkëmbyen pikëpamjet për zhvillimet globale, me theks të posaçëm në sektorin e sigurisë.
Modéer nënvizoi rëndësinë e komponentit ekonomik për sigurinë dhe ajo siguroi përkrahjen e fuqishme që Suedia do t’i japë Kosovës në kuadër të Strategjisë Afatgjatë për Ballkanin Perëndimor 2014-2020. Më herët gjatë ditës, përfaqësuesja e shtetit suedez ka nënshkruar me autoritetet kosovare marrëveshjen për asistencë në vlerë prej 70 milionë euro.
Gjithashtu, sekretarja Modéer ka përshëndetur angazhimin e Qeverisë së Kosovës në dialogun me Serhinë dhe ratifikimin e Marrëveshjes së Stabilizim Asociimit me Bashkimin Evropian, si hyrje të Kosovës në marrëdhënie kontraktuale me famijen evropiane.
