Këshilli për Mbrojtjen e Luftëtarëve të UÇK-së ka njoftuar se të hënën do të protestojnë para objektit të Qeverisë së Kosovës për shkak të vonesave dhe parregullsive tjera që pretendojnë se po ndodhin në lidhje me veteranët e Ushtrisë Çlirimtare të Kosovës. Megjithëse thanë se do të angazhohen që protesta të jetë paqësore, ata nuk kanë garantuar që gjithçka do të shkojë mirë për shkak të padrejtësive të mëdha që u janë bërë veteranëve nga ana e Qeverisë.
Kryetari i KML të UÇK-së, Xhevdet Qeriqi në një konferencë për media tha se veteranët përkundër marrjes së certifikatave, janë ballafaquar me vonesën e marrjes së pensionit që i takon me statutin e Veteranit të luftës. Qeriqi deklaroi se kjo protestë vjen si pasojë e padrejtësive që po u bëhen veteranëve të luftës së UÇK-së.
“Iu njoftojmë se veteranët e luftës ditën e hënë nga ora 12:00 do të protestojnë para Qeverisë së Republikës së Kosovës, për padrejtësitë që po u bëhen veteranëve të luftës së UÇK-së. Pra, i kemi disa kërkesa, të cilat kërkojmë nga ana e Qeverisë që të përmbushen”, tha ai.
Ai ka lexuar disa kërkesa të Këshillit për Mbrojtjen e Luftëtarëve të UÇK-së, ndër to edhe a të që komisioni të ndërmarrë masa rreth lëshimeve që i ka bërë dhe të hiqen nga lista, ata persona të cilët nuk kanë marrë pjesë fare në luftë.
“Qeveria e Kosovës t’i kryej obligimet që u ka mbetur në borxh veteranëve në pension, prej datës së aplikimit. Komisioni Qeveritar për njohjen e statutit të veteranit të marrë një vendim që t’u hap rrugë invalidëve, që të aplikojnë për të drejtën në pension. Qeveria e Republikës së Kosovës të emërojë një komision mjekësor, i cili do ta përcaktojë shkallën e invalidit për ata invalid të cilët nuk e kanë të zgjidhur këtë problem. Kërkojmë nga komisioni që në kohë sa më të shkurtër të përfundojë shqyrtimin e ankesave dhe të publikojë ato. Kërkojmë nga komisioni të ndërmarrë masa rreth lëshimeve që i ka bërë dhe të hiqen nga lista, ata persona t ë cilët nuk kanë marrë pjesë fare në luftë”, ka thënë ai.
Qeriqi shtoi se protesta do të jetë paqësore, mirëpo për këtë nuk mund të garantohet, edhe pse si Këshill do të angazhohen në mbajtjen e rregullit. Ai theksoi se padrejtësitë e mëdha që janë bërë ndaj veteranëve nga ana e Qeverisë, mund të ndikojë në eskalim të situatës.
“Ne do t’a bëjmë maksimumin që protesta të jetë paqësore, por asnjëherë nuk mund të garantojmë për shkak se po bëhen padrejtësi të mëdha, nuk po kryhen obligimet nga ana e Qeverisë, të cilat janë të përcaktuara me ligj. Ne do të mobilizohemi që protesta të jetë paqësore, mirëpo asnjëherë nuk mund të garantojmë që do të jetë paqësore. Përmes juve i ftojë të gjithë veteranët që t’i përgjigjen protestës”, tha ai.
Sipas tij, nëse Qeveria është e gatshme të shqyrtojë kërkesat e tyre, ata mund edhe ta anulohet protestën.
“Ne jemi të hapur, të hapur deri ditën hënë në rast se ata pranojnë që t’i përmbushin këto kërkesa, ne do të anulojmë protestën”, tha ai.
Vlerësohet se rreth 3 mijë deri në 4 mijë veteranë janë ballafaquar me vonesë të marrjes së pensionit.
