Nji 28 vjeçar nga Kosova, për mediat italiane, ka rrëfye tanë rrugën gjatë shkuemjes në Siri për me luftue dhe realitetin krejt ndryshe që ishte atje.
Mbasi u kthye në Kosovë, në 2013’n, u arrestue nga autoritetet vendase, dhe deklaroi se asht pendue për atë që e ka ba.
“Unë s’jam terrorist. Shkova atje me luftue për të drejtën, por kam pa shumë familje siriane të masakrueme”, tha 28 vjeçari n’intervistë për kanalin ‘7’ italian dhe emisionin “Piazzapulita” të datës 7 Kallnor 2016.
“Na në Kosovë i kemi ende të freskëta kujtimet nga lufta dhe e dimë sa e randësishme asht ndihma e komunitetit ndërkombëtar për me luftue kundër regjimit”, tha ai.
Tue e shpjegue se në Siri shkoi nga aeroporti i Prishtinës drejt Stambollit, e prej aty u transportue nga disa turq, të cilët e ndihmuen me kalue kufinin turko-sirianë, 28 vjeçari e pranon se ka gabue për rrugën që mori.
“Pastaj në fillim në Siri, kemi shkue n’Alepo, por në dy muejt e parë situata ishte deri diku e qetë, dhe pashë se grupet luftonin njana me tjetrën”, tha ai.
“Aty kishte pjesëtarë të ISIS’it, por jo aq shumë si mendojmë na nga këtu”, kallxon ai për televizionin italian dhe thote se atje ka qëndrue gati dhetë muej.
Situatën atje ai e përshkruen si shumë të randë, mbasi thotë se ka pa, përvec të tjerëve, edhe fëmi të vramë e masakruem. Ky i ri deklaron se nuk dëshiron me i kujtue ma ato që i ka përjetue.
Aktualisht ky person po mbahet n’arrest shtëpiak, mbasi konsiderohet si i penduem për veprimin që ka ndërmarrë.
Ai pret të gjykohet simbas ligjit të miratuem nga Kuvendi i Kosovës i cili u ndalon shtetasve kosovarë pjesmarrjen në nji luftë apo konflikt të huej, tue i ngarkue me vepër penale. /lajmi.net
