Profesori i gjeografisë, Shpejtim Bulliqi, njëherësh edhe deputet i Lidhjes Demokratike të Kosovës, thotë se nisma e presidentes Atifete Jahjaga për ta krijuar një komision vlerësues për shënjimin e vijës kufitare më Malin e Zi është e qëlluar, mirëpo nuk është aspak e qëlluar që ky komision të emërohet si Komision Ndërkombëtar.
“Ne nuk pajtohemi me atë që të quhet Komision Ndërkombëtar, për faktin se domosdoshmërisht, në suaza të atij komisioni do të ishte e rrugës të ishin edhe ekspertët vendorë. Kosova ka njerëz të mjaftueshëm që mund ta bëjnë këtë punë. E them me plotë përgjegjësi se ka edhe ekspertë të mirë”, ka deklaruar Bulliqi në emisionin “Kontakt”, në Tribuna Channel.
Sipas tij, do të ishte e udhës që ky komision vlerësues të formohet nga ekspertët vendorë e që ata ndërkombëtarë ta marrin rolin e vëzhguesit
Bulliqi ka thënë se deri më sot nuk ka pranuar asnjë ftesë nga presidentja që ai të jetë pjesë e këtij komisioni, mirëpo shton se nëse e fton ai është i gatshëm ta japë kontributin e tij.
”Kam frikë që koha është relativisht e shkurtë që të formohet ky komision dhe të dalë me raport vlerësues brenda mandatit të presidentet Jahjaga”, ka thënë deputeti i LDK-së.
Ai këmbëngul se ndryshe mund të japin kontributin ekspertët vendor dhe ndryshe ata ndërkombëtarë, pasi këta të fundit, siç thotë ai, mund të vijnë për një shumë parash.
“Ekspertët vendorë mund të japin kontributin edhe pa para, vetëm që ta nxjerrin gjendjen reale e cila është”, shtoi ai.
