Deputeti i Lidhjes Demokratike të Kosovës, Fatmir Rexhepi nuk ka treguar nëse do të voton pro apo kundër zgjedhjes së Hashim Thaçit për president të Republikës, por ai ka thënë se kontributi i tij në këtë drejtim do të jetë karshi mendimit dhe vlerësimit të votuesve të LDK-së.
Rexhepi, në një prononcim për “Zeri.info”, ka bërë thirrje pozitës dhe opozitës të ulen në një tryezë bisedimi dhe të zgjidhin këtë krizë të krijuar tani e pesë muaj, e pastaj të flitet për çështjen e presidentit të shtetit.
“Duhet të jetë porosi për gjithë liderët e partive politike që të ulen ta kalojnë krizën, pa e kaluar krizën nuk duhet të shkoj në procedurë të mëtutjeshme. E pastaj ku do ta zgjedhim presidentin nuk mendoj se duhet të zgjidhet presidenti nëpër tavane por që duhet të bëhet një konsensus. Nëse jo, të shikohet mundësia e ndryshimit të sistemit zgjedhor. Kam një qëndrim sa i përket elektoratit të LDK-së duke e ditur vullnetin e tyre dhe i kam qenë besnik votuesit të LDK-së. Është e vërtetë që votuesit tonë i detyrohemi shumë”, është shprehur Rexhepi.
Sipas ish-ministrit të Punëve të Brendshme, më e rëndësishme është të ketë tejkalim të krizë politike edhe në qoftë se ajo zgjatë një apo dy muaj, e pastaj të ketë bashkërenditje nga partitë politike rreth çështjes së presidentit, zgjedhjeve të jashtëzakonshme dhe bisedimeve ndërmjet Kosovës dhe Serbisë.
“Duhet të ketë një konsensus që edhe opozita të merr pjesë në bisedimet me Serbinë dhe të marrim një konsensus edhe për zgjedhjet. Në qoftë se ja donë të mirën Kosovës të kthehen në tryezë të debatit të gjejnë kompromise dhe të ecin përpara. Pa i zgjidh këto probleme nuk mendojë se duhet të ketë votim për presidentin”, ka thënë ai. /Zëri/
