Milani barazoi 2-2 në fushën e Empolit, në javën e 21-të të Serisë A italiane.
Kuqezinjtë, që i janë afruar zonës europiane, mbi të gjitha edhe falë momentit negativ të Romës, nuk arritën t’i japin vazhdimësi suksesit në Kupë me Carpi-n dhe me Fiorentinën në kampionat, duke u detyruar të kënaqen vetëm me një pikë në stadiumin Castellani. Kjo edhe sepse përballë kishin një kundërshtar në moment fantastik forme, me Empolin që kishte pësuar vetëm një humbje në tetë ndeshjet e fundit. Carlos Baça kaloi Milanin në avantazh pas 8 minutave lojë. Gjyqtari lejoi lojën të vazhdonte edhe pse kolumbiani u nis me një këmbë mbi vijën e mbrojtësve, ndërsa i vetëm me Skorupski-n nuk gaboi.
Reagimi i Empolit nuk mungoi dhe në të 32-ën, polaku Zielinski riktheu barazpeshën. Milani kaloi sërish në epërsi me Bonaventura-n, sapo nisi pjesa e dytë e sfidës. Por, rrjeta fatlume e kapitenit nuk i mjaftoi Djallit. Në të 61-ën Maçarone barazoi sërish, me Donnarumma-n, që nuk largoi si duhet pas goditjes standarde të Puçiarelli-t. Aktivizimi i Mario Balotelli-t nuk i mjaftoi Milanit, ndërsa pas dështimit të transferimit në Kinë, Luiz Adriano qëndroi në stolin e rezervave. Me këtë barazim, Milani pozicionohet i gjashti në renditje me 33 pikë. Edhe pse synojnë kupat e Europës, kuqezinjtë kanë vetëm një pikë më tepër se Empoli, me të besuarit e Giampaolo-s që synojnë të mbyllin sa më shpejt çështjen e mbijetesës.
