Bashkimi Evropian po shpërbëhet, ndërsa kriza me refugjatë ka dëmtuar kancelaren e Gjermanisë, Angela Merkel, vlerëson miliarderi amerikan me prejardhje hungareze George Soros.
Në forumin ekonomik botëror që mbahet në Davos të Zvicrës, Soros thotë se Evropën e ka kapur panik në politikën e tyre të azilit, raporton AFP.
Ai gjithashtu ka vlerësuar se kriza e refugjatëve e ka goditur rëndë kancelaren gjermane Merkel.
“Ka dashur që ta ndaloj krizën e refugjatëve, por me këtë e rrezikoi dhe e humbi kapitalin e vet politik, pasi që veprimi i saj për hapjen e Gjermanisë nuk ishte përgatitur në formën e përshtatshëm”, ka thënë Soros, transmeton lajmi.net.
Njeriu që njihet edhe për fondin e tij të dedikuar në shtetet në zhvillim, ka vlerësuar se ekonominë e Kinës e pret një “ulje e rëndë”, që do të ndikojë në një deflacion global.
“Kjo krizë do të jetë e pashmangshme, por Kina do të ketë sukses që ta përballojë atë, në saje të rezervave të mëdha valutore”, ka thënë miliarderi me prejardhje hungareze, transmeton lajmi.net.
Soros ka folur edhe për situatën në Rusi, duke thënë se ky shtet është në një “pozitë të dobët” dhe, beson se mund të ketë rezerva të mjaftueshme për vetëm edhe “disa vite”.
