Pep Guardiola është i prerë në vendimet dhe idetë e tij. Pas 2.5 vitesh, trajneri spanjoll fiton dy herë titullin dhe një herë Kupën, rezultat normal. Gazeta “Sportbild” zbulon edhe arsyet pse e çuan Guardiolën në mosrinovimin e kontratës.

Shkak janë politikat e merkatos, në të cilat bënin ligjin bosët e klubit dhe jo trajneri. Arturo Vidal u befasua me reagimin e Guardiolës në ndeshjen e fundit ndaj Hanoverit kur e zëvendësoi në fund. Ai ndihej si “mollë sherri” mes trajnerit dhe krerëve të klubit.

Suarez, Nejmar- Fakt është se politikat e merkatos së klubit dhe të trajnerit ishin ndryshe, për të mos thënë të kundërta. Kur Guardiola mori frenat e Bajernit, në 2013-n, dhe Suarez ishte në merkato, spanjolli e këshilloi klubin bavarez ta blinte uruguaianin. Bosët e Bajernit e refuzuan. Edhe braziliani Nejmar ishte në planet dhe në dëshirat e Guardiolës.

Alonso-Kros – Pep Guardiola kontaktoi Ksabi Alonson në janar të sezonit 2013-2014. Ai u josh dhe parashikonte një transferim në Mynih. Por Bajerni kishte Shvajnshtaigerin dhe Krosin në mesfushën defensive, çka bëri kundërshtimin e transferimit të Alonsos. Largimi i Toni Kros shkaktoi mosmarrëveshje mes trajnerit dhe klubit.