Sindikata e Bashkuar e Arsimit me anë të një shkrimi ka reaguar ndaj institucioneve të qeverisë për injorimin që sipas tyre po u bëjnë punëtorëve të arsimit.
“Me këtë reagim publik po i tregojmë edhe një herë ministrit Arban Abrashi dhe gjithë kabinetit qeveritar dhe kryeministrit Isa Mustafa se nëse nuk bëhet planifikim buxhetor për realizimin e kërkesës që të vihet në jetë Ligji mbi skemat pensionale të financuara nga shteti dhe nëse vazhdohet me praktikën e injorimit të viteve 90-99, atëherë SBASHK-u do të reagojë me gjithë mundësitë dhe mjetet e lejuara sindikale”, thuhet në reagim.
Sipas SBASHK-ut institucionet lokale dhe drejtoritë komunale, por edhe institucionet tjera bashkë me kryetarët e komunave nuk janë duke dhënë as edhe një sinjal se po angazhohen për të zgjidhur çështjen e udhëtimit për mësimdhënësit udhëtarë dhe çështjen e 3 pagave për të punësuarit në arsim me rastin e pensionimit të tyre.
Siç thuhet në komunikatë, ata arsyetohen se nuk ka mjete, por ky “arsyetim nuk vlen as pesë para sepse si mund të ketë mjete për këto dy kërkesa nëse ato me kohë nuk planifikohen në buxhetin për vitin vijues. Duke mos bërë planifikime buxhetore për realizimin e këtyre kërkesave qeveritë lokale sikur pëlqejnë të ndodhin greva në institucionet arsimore dhe nëse vazhdohet kështu greva do të ketë”.
