Pavarësisht luftës së ashpër nga ana e Serbisë, për të penguar anëtarësimin e Kosovës në UNESCO, kjo e fundit ka arritur t’i mbledhë gjithsej 44 nënshkrime nga vendet anëtare të kësaj agjencie, raporton KTV.
Kosova ka kaluar fazën e parë të fushatës së saj për anëtarësimin në UNESCO, duke mbledhur kështu gjithsej 44 nënshkrime nga vendet anëtare të kësaj agjencie.
Zëvendësministri i Jashtëm, Petrit Selimi, tha se ky është një numër rekord i nënshkrimeve të bashkësponzoruesve në historinë e re të UNESCO-s.
Selimi u shpreh i bindur se Kosova do të anëtarësohet në këtë mekanizëm të OKB-së, pasi që, sipas tij, ata kanë marrë premtime edhe nga shumë shtete që do ta përkrahin anëtarësimin e shtetit tonë në UNESCO.
Selimi, gjithashtu, tregoi se me anëtarësimin e Kosovës në këtë agjenci të OKB-së, do të ketë përfitime të shumëfishta Bordi Ekzekutiv i UNESCO-s do ta shqyrtojë kërkesën e Kosovës për anëtarësim më 3 tetor, ndërsa Asambleja e Përgjithshme e UNESCO-s pritet të votojë në javën e parë të nëntorit, me ç’rast do të kërkohen 2/3 e votave për pranimin e Kosovës në këtë agjenci të OKB-së.
Ndërkohë, kërkesa e Shqipërisë që UNESCO ta vërë në rend dite anëtarësimin e Kosovës në këtë organizatë, për Qeverinë e Serbisë nuk është veprim miqësor dhe nuk çon në marrëdhënie të mira ndërfqinjësore. Kështu ka thënë Ministri i Punës, i Punësimit dhe i Çështjeve Sociale, Aleksandër Vulin.
Sipas tij, Serbia do të luftojë kundër këtij veprimi dhe se i vjen keq që Shqipëria ka vendosur ta ndërmarrë një hap të tillë.
Kundër anëtarësimin të Kosovës në UNESCO po punon e gjithë diplomacia dhe aparati shtetëror serb.
