Kreu i Kuvendit, Ilir Meta, ka pritur sot në një takim Presidenten e Kosovës, Ahtifete Jahjaga, dhe delegacionin që e shoqëronte. Takimi është zhvilluar në Kuvendin e Shqipërisë, me praninë e nënkryetarit të Kuvendit, Shpëtim Idrizi, dhe kryetares së Komisionit të Jashtëm, Arta Dade.
Gjatë bashkëbisedimit, kreu i Kuvendit është shprehur se Shqipëria e mbështet plotësisht avancimin e Kosovës në procesin e integrimit euroatlantik. Meta ka theksuar se duhen përqendruar përpjekjet në forcimin e institucioneve demokratike, sundimin e ligjit, shtimin e njohjeve ndërkombëtare dhe anëtarësimin në organizatat e ndryshme rajonale e ndërkombëtare si dhe në normalizimin e marrëdhënieve me Serbinë.
Siç njofton zyra e shtypit pranë Kuvendit, Meta është shprehur se marrëdhëniet Shqipëri-Kosovë janë strategjike për mbarëvajtjen e stabilitetit dhe sigurisë rajonale. Ai e ka siguruar presidenten e Kosovës se Shqipëria do të jetë gjithnjë përkrah Kosovës në mbështetje të progresit të gjithanshëm demokratik e shoqëror të saj.
