Presidenti i Serbisë Tomislav Nikoliq ka thënë sot se Perëndimi është më mirë të bashkëpunoj me Rusinë, dhe të mos luaj me krenarinë dhe vlerat ruse pasi mund të rrezikohet paqja dhe siguria botërore.
“Do të ishte mirë të bashkëpunohet me Presidentin Putin, dhe të shmangen konfliktet me të, për shkak se ai mund ta rrënoj botën”, ka thënë Nikoliq në një intervistë për “Sputnik”, transmeton Indeksonline.
Nikoliq është shprehur i bindur se përderisa perëndimorët luajnë me krenarinë dhe vlerat ruse; përderisa luajnë me dhjetëra dhe qindra miliona njerëz, nuk mund të arrihet paqja dhe siguria në botë.
Duke folur për takimin e tij me Presidentin e Rusisë Vladimir Putin në Kinë, Nikoliq ka thënë se ai “dhe presidenti rus e shfrytëzojnë çdo rast, siç ishte rasti në paradën e Ditës së Fitores në Moskë si dhe në hapjen e lojërave në Azerbejgjan, që të diskutojnë mundësitë për bashkëpunim tash dhe në të ardhmen, në mënyrë që Serbia dhe Rusia të mbeten simbol uniteti.”
Nikoliq, përkundër politikës liberale dhe pro-perëndimore që kryeministri serb Aleksandar Vuçiq po zbaton, ka thënë se “kur përmendet Rusia, automatikisht aty hyn edhe Serbia, ose anasjelltas.”
Nikoliq ka thënë se e ka falënderuar Presidentin Putin për votën kundër ndaj rezolutës britanike për shpalljen e masakrës së Srebrenicës si gjenocid në Këshillin e Sigurimit.
“Presidenti Putin m’u ka përgjigjur me vetëm dy fjalë: Je mik i imi, je mik i imi”, ka thënë Nikoliq.
