Disa të rinj shqiptarë që studiojnë, punojnë dhe jetojnë në Berlin sot kanë organizuar një aksion simbolik për të kujtuar të pagjeturit nga lufta e Kosovës në Ditën Ndërkombëtare të Personave të Zhdukur
Sipas organizatorëve, ky aksion u bë për të tërhequr vëmendjen pasi që, sipas tyre, deri tani asnjëherë nuk ka pasur organizime në diasporë për të përkujtuar personat e pagjetur.
“Aksioni ishte një nismë vullnetare e disa të rinjve shqiptarë që jetojnë në Berlin. Meqë deri në këtë vit nuk ka pasur ndonjë përkujtim të këtyre personave të pagjetur në diasporë, ky grup, përfshirë edhe mua, menduam të bëjmë diçka në këtë drejtim për të sjell vëmendjen te ky fakt”, ka deklaruar Zana Ahmetgjekaj, një nga pjesëmarrëset në aksion, për Koha.net.
Ajo ka njoftuar se lejen për aksion e kanë marrë nga komuna e Berlinit dhe organizimi u bë në qendrën kryesore të qytetit, te porta e Brandenburgut.
Grupi kishte varë letra me pikëpyetje dhe numrin 1655 për të treguar numrin e personave të zhdukur nga lufta e Kosovës.
Sipas Ahmetgjekajt, shumë kalimtarë u interesuan rreth kësaj çështjeje dhe u befasuan me numrin e madh që figuron në listën e të zhdukurve.
“Qëllimi i aktivitetit ishte jo vetëm ngritja e vetëdijes qytetare për të humburit në Kosovë, por edhe një reagim kundrejt vullnetit të vogël politik për ndriçimin e fatit të këtyre personave. Fjalime nuk pati pasi që donim të ishte sa më e thjeshtë, por kemi biseduar personalisht me çdo individ që dëshironte të dinte më shumë”, shtoi ajo.
