Profesori dhe tashmë analisti i njohur i zhvillimeve politike e shoqërore në vend, Lumir Abdixhiku përmes rrjetit social Facebook ka komentuar përmbajtjen e Marrëveshjes për Asociacionin e Komunave me shumicë serbe në Kosovë, duke e cilësuar “në versionin më të thjeshtë, një model i autonomisë së gjerë në Kosovë”.

Kjo është përmbajtja e postimit të Abdixhikut:
Me kompetenca të plota e të pavarura në ekonomi, shëndetësi, edukim, dogana, polici, gjyqësor, buxhet e territor – me shërbyes civilë e aspak joqeveritarë, me Kuvend, kryetar e identitet të veçantë – Asociacioni ka të gjitha elemente e një entiteti autonom. Asociacioni pra është, në versionin më të thjeshtë, një model i autonomisë së gjerë në Kosovë. Së paku është modeluar për të funksionuar si i tillë; dhe kështu ai, padyshim, kalon Pakon e Ahtisaarit. Përputhja me ligjet e Kosovës, sado lajm i mirë, nuk e zbut shumë këtë fakt.

Është përmbajtja dhe qëllimi çfarë ka rëndësi.
E sikur Asociacioni të kishte qëllime të pro-Republikës e pro-pavarësisë, atëherë ndoshta dhe do të bënte kuptim. Por nuk ka. Ka qëllime të varësisë së saj, të pengimit të saj, të refuzimit të saj – prandaj dhe bën një lajm jo të mirë për vendin. Me Asociacion, Republika nuk i ka afruar refuzuesit e saj, ajo veçse i ka fuqizuar ata.