Drejtori i Zyrës për Kosovën, Marko Gjuriq ka thënë sot se përfaqësuesit e Beogradit në bisedimet që do të mbahen me Prishtinën javën e ardhshme në Bruksel, shkojnë me synimin që të krijojnë Asociacionin e Komunave me shumicë Serbe.
Pas takimit me përfaqësues të komunave serbe në Kosovë, siç transmeton rtk, ai ka thënë se në javën e ardhshme delegacioni serb do ta arsyetojë besimin që serbët e Kosovës ia kanë dhënë qeverisë serbe.
Gjuriq ka thënë se do të bëhet çdo gjë e mundur në përputhje me interesat kombëtare dhe shtetërore të Serbisë.
“Besoj se do të bëjmë çka të jetë e mundur në mënyrë që të arrijmë një marrëveshje. Ne do të vazhdojmë të veprojmë në mënyrë konstruktive drejt formimit të Asociacionit”, ka theksuar ai.
Sipas tij, Asociacioni nuk është kundër askujt, por është faktor stabiliteti dhe bashkëjetese midis minoriteteve në Kosovë.
“Të gjithë ata që marrin pjesë në bisedime nga delegacioni serb, dialogun e përdorin që t’i bashkojnë serbët dhe shqiptarët nga Kosova, dhe jo si mjet për shkaktuar trazira dhe jostabilitet”, ka thënë Gjuriq, transmeton koha.net.
Sipas tij, serbët nga Kosova në takimin e sotëm e kanë mbështetur qeverinë serbe dhe shefin e delagacionit serb, Aleksandar Vuçiqin, i cili sipas tij, krijimin e Asociacionit e sheh si mundësi për fuqizim ekonomik të popullit serb në Kosovë.
