Veteranët e UÇK-së, që protestuan të premten para ndërtesës së Qeverisë, janë të vendosur t’i vazhdojnë protestat, deri sa kërkesat e tyre të merren në konsideratë.
Njëri nga veteranët protestues, Naim Gashi, ka thënë për KTV-në se ata dyshojnë që listat e veteranëve po manipulohen politikisht.
I kontaktuar përmes telefonit, kryetari i Komisionit për Verifikimin e Listave të Veteranëve, Agim Çeku, ka deklaruar për Kohavisionin se e di që procesi është zvarritur.
“Unë jam plotësisht i vetëdijshëm për zvarritjen e procesit, por nuk është e vërtetë që kjo është bërë për arsye politike siç kanë thënë veteranët dje, por për arsye kryesisht objektive”, i ka thënë KTV-së, kryetar i Komisionit për Verifikimin e Veteranëve të UÇK-së, Agim Çeku.
Në përkrahje të veteranëve, ka dalë edhe Lëvizja Vetëvendosje, e cila ka lëshuar një komunikatë për shtyp në mbështetje të tyre.
E ndërkohë është liruar nga masa e ndalimit policor Kryetari i Këshillit për Mbrojtjen e të Drejtave të Luftëtarëve të UÇK-së Xhevdet Qeriqi. Bashkë me të janë liruar edhe tetë veteranët tjerë të cilët dje së bashku me Qeriqin janë arrestuar nga policia pas protestës e cila u mbajt para ndërtesës së Qeverisë. Lajmin e ka konfirmuar vet Qeriqi, sipas të cilit ai dhe tetë bashkëluftëtarë tjerë janë liruar ndërsa njëri nga ta ka mbetur në paraburgim pasi që ka pasur një dënim tjetër.
“Po sapo jemi liruar, nuk kemi dalë as para gjykatës, vetëm na kanë liruar, sigurisht se rasti do të shkojë në procedurë të rregullt”, ka thënë Qeriqi. Dje policia arrestoi dhjetë nga protestuesit të cilët rrëzuan rrethojën e ndërtesës së Qeverisë si dhe dëmtuan një veturë.
