Sondazhin e publikuar të mërkurën nga “Lëvizja Fol”, sondazh në të cilin partia e Thaçit ende e ruan primatin, duke vazhduar me Lidhjen Demokratike të Kosovës e cila radhitet e dyta, për të vazhduar me Lëvizjen Vetëvendosje (LVV), Aleancën për Ardhmërinë e Kosovës (AAK) dhe Nisma për Kosovën, partitë opozitare e vlerësojnë në mënyra të ndryshme.
Zëdhënësi i Lëvizjes Vetëvendosje (LVV), Frashër Krasniqi, ka thënë për Telegrafin se LVV po rritet në vazhdimësi, dhe kjo sipas tij, po vërehet edhe në teren, ku aktualisht janë duke bërë punë të madhe që t’i forcojmë strukturat tona.
Ai ka thënë se kjo rritje vjen nga fakti që qytetarët po e kuptojnë përherë e më shumë se alternativa e vetme në Kosovë është LVV me konceptin e saj të drejtë.
“Ne do të vazhdojmë punën në terren dhe konsistencën në veprimet tona publike institucionale e jashtë institucionale, në mënyrë që ta ndryshojmë gjendjen në Kosovë”, ka shtuar Krasniqi.
Zëdhënësi i AAK-së, Muharrem Nitaj, ka theksuar për Telegrafin se është e drejtë legjitime e “Lëvizjes Fol” të publikoi çfarëdo sondazhi. Sipas tij, informatat e AAK-së flasin për disa përqindje të tjera.
“Unë shpresoj se ‘Lëvizja Fol’ i ka mostrat kredibile”, ka shtuar Nitaj.
Anëtari i kryesisë së “Nisma për Kosovën”, Bilal Sherifi, ka thënë për Telegrafin se ai këtë sondazh e ka lexuar vetëm nëpër media, dhe se sipas tij, raportin në tërësi nuk e ka parë.
Ai ka theksuar se nuk e di çfarë metodologjie është përdorur dhe në cilat rajone janë përqendruar më shumë.
“Nuk mund t’i komentoj lajmet të cilat janë raportuar vetëm ne media –në portale. Po ta kisha raportin nga terreni nuk do të ishte problem”, ka shtuar Sherifi.
Ndryshe, të mërkurën Lëvizja Fol e ka publikuar një sondazh të bërë me qytetarët e Kosovës, në lidhje me atë se si do të votonin për partitë politike, ku rezulton se rreth 18.7 për qind e të anketuarve janë përgjigjur se do ta votonin PDK, rreth 17.70 për qind e të anketuarve janë përgjigjur se do ta votonin LDK, rreth 16.60 për qind e të anketuarve janë përgjigjur se do ta votonin LVV, rreth 4.20 për qind e të anketuarve janë përgjigjur se do ta votonin AAK, rreth 2.50 për qind e të anketuarve janë përgjigjur se do ta votonin Listën Serbe – LS, rreth 1.50 për qind të anketuarve janë përgjigjur se do ta votonin Nismën për Kosovë, rreth 1.20 për qind e të anketuarve janë përgjigjur se do ta votonin Aleancën Kosova e Re – AKR.
Ndërkaq, rreth 24.00 për qind e të anketuarve janë përgjigjur se nuk janë të sigurt se cilën parti do ta votonin, rreth 11.10 për qind e të anketuarve kanë refuzuar të përgjigjen në këtë pyetje, ndërsa rreth 2.70 për qind e të anketuarve janë përgjigjur se do të votonin për parti të tjera. /Telegrafi/
