“Xhihadi s’është romantik” , u thotë militanti vajzave që duan t’i bashkohen IS-it
Një postim për “nuset e xhihadit”, se si ato jetojnënë territoret e kontrolluara nga militantët e Shtetit Islamik në Siri dhe Irak, është shpërndarë nëpër mediat sociale në vendet rusisht-folëse gjatë kësaj jave.
Postimi është i datës 14 korrik, dhe është bërë në një llogari që tashmë është mbyllur, e cila i përkiste një militanti të Shtetit Islamik nga Kaukazi Verior, i cili e quan veten Djundullah.
“Realisht, a e imagjinoni veten duke ecur pranë lumit Eufrat me burrat tuaj? Për Allahun, jepni fund këtij romanticizmi! Varroseni atë në varrezat e iluzioneve”, thuhet tutje në postim.
Autori i këtij postimi shkon më tutje duke paralajmëruar se çdo iluzion romantik për “nuset” e luftëtarëve dhe për jetën nën territoret e kontrolluara të Shtetit Islamik në Siri dhe Irak,“bombardimet e para do t’ia prishin magjinë”.
“Jeta nuk është e tillë, ashtu siç përshkruhet në rrjetet sociale”, thuhet tutje në postim.
Ky postim i këtij xhihadisti është shpërndarë në rrjetet sociale VKontakte dhe Facebook dhe është pranuar pozitivisht nga një numër i militantëve të Shtetit Islamik, të cilët janë rusisht-folës, duke sugjeruar se shumë besojnë se ka ndryshim në mes të realitetit dhe se si propaganda e Shtetit Islamik e portretizon jetën e “xhihadistëve”, të paktën për gratë.
Një militant, Abdurakhman ad-Daghestani, ka thënë se ky postim “u është dedikuar femrave”.
Ndërkaq, një militant tjetër, llogaria e të cilit në rrjetin social VKontakte është fshirë, ka thënë se: “ditët e vështira kombinohen me ditë të mirë. Përmes vështirësive vjen lehtësimi. Mos e bëj akoma më të vështirë situatën për motrat tona”, kaporositur ai .
Disa nga militantet femra, gjithashtu janë pajtuar me mesazhin e këtij postimi.
“Koment i ashpër, por i saktë”, ka shkruar një militante femër, e quajtur Imara Khasanova.
Postimi i këtij xhihadisti, ka për qëllim gjoja për të kritikuar gratë që nuk e kuptojnë realitetin e “xhihadit”.
Por, ka një ndjenjë të mburrjes në këtë postim, pasi që autori mundohet që të tregojë se nëpër çfarë gjëra të vështira kalojnë militantët trima, të cilët jetojnë “në botën e vërtetë” të të ashtuquajturit Shteti Islamik, e cila shkon përtej portretizimit që i është bërë në rrjetet sociale.
Përtej kësaj, ky postim shfaq një trend në rritje në mesin e militantëve rusisht-folës, për të gjetur mënyra të reja për të folur për vështirësitë e jetës në Siri. Ky trend sugjeron se disa militantë të rinj të Shtetit Islamik, po e kanë të vështirë të mësohen me realitetin e luftës, veçanërisht ata që humbin shokët e tyre në beteja.
Postimi thotë se “hixhra”- një shprehje në gjuhën arabe që do të thotë migrimi në tokat e kontrolluara nga Shteti Islamik- dhe “xhihadi nuk janë romancë”.
Ky zhvillim, i cili bie ndesh me propagandën e Shtetit Islamik, në të cilën thuhet se militantët që marrin rrugën e “hixhras”janë “në rrugën e Allahut”, dhe se nuk duhet të ndihen të frikësuar dhe të jenë të trishtuar. Pavarësisht luftës, ata duhet të ndihen të gëzuar se janë pjesë e një beteje historike “kundër të pafeve” dhe në krijimin e “kalifatit”.
Por, duke e u ballafaquar me humbje të mëdha në betejat e fundit, militantët rusisht-folës, janë duke shprehur ndjenjat e tyre të vërteta nëpër rrjetet sociale.
“Kur vëllai yt më i ngushtë heq dorë nga kjo botë dhe shkon në rrugën e Allahut, kjo botë më pas bëhet aq e parëndësishme dhe patetike”, ka shkruar një militant kazak i quajtur Artyom.
“Edhe në momentet kur nuk dëshiron më të jetosh dhe më pas shikon vëllezërit që kanë rënë martir, ti e sheh botën në formën e saj të vërtetë dhe e kupton se sa e parëndësishme është dhe më pas ti dëshiron që ta lësh atë sa më parë”, thuhet në postim.
Mesazhi për gratë, të cilat i janë bashkuar Shtetit Islamik dhe mendojnë se “xhihadi” është “romantik”, vjen edhe si pasojë e rritjes së pakënaqësive në mesin e militantëve, të cilët po ankohen se nuk ka “nuse” të mjaftueshme për ta në Siri.
Propaganda e rekrutimit e pranon se procesi i “hixhras” është i rrezikshëm dhe i vështirë. Por, gjithashtu, inkurajon gratë që t’u bashkohen militantëve të Shtetit Islamik, duke e konsideruar atë si gjest romantik dhe duke iu premtuar “burra muxhahedin, të cilët e kanë frikë Zotin dhe janë të sinqertë”.
Në propagandën e Shtetit Islamik thuhet se gratë që u bashkohen atyre, do të marrin pjesë “në ngjarje të rëndësishme të islamit”.
