Empoli, Hysaj vlen më shumë se 4 mln Euro
4 milionë Euro nuk mjaftojnë për Elseid Hysaj. 22-vjecari i Kombëtares Shqiptare është kthyer në një thesar të vogël për Empolin falë paraqitjeve të mira që ka bërë me skuadrën sezonin e kaluar dhe klubi toskan kërkon të përfitojë sa më tepër nga shitja e tij duke qenë se interesi për mbrojtësin nga Shkodra është i madh. Një nga klubet që ka bërë hapa më konkretë në drejtim të Hysaj-t është Napoli, por sic bëjnë të ditur mediat italiane, Empoli bën rezistencë për të përfituar sa më tepër.
Drejtori Sportiv i klubit, Marcello Carli ka deklaruar në lidhje me shqiptarin, “Për Hysaj-n mund të mendojmë shitjen vetëm nëse vjen një ofertë serioze. 3 apo 4 milionë nuk përbëjnë një ofertë të mjaftueshme për ta lejuar të largohet. Kur ishim në tratativa me Napolin për Valdifiorin, u fol edhe për Hysaj-n , por pastaj nuk e kam dëgjuar më klubin e kaltër. Në ditët e ardhshme pres një ofertë të rëndësishme nga Napoli për Hysaj-n, por në fakt jo vetëm nga klubi i kaltër”.
Strategjia e Empolit është e qartë, Hysaj që ka një kontratë e cila skadon në Qershorin e ardhshëm mund të largohet vetëm në këmbim të një shume të majme. Për më tepër që klubi mund të presë nxitjen e një ankandi serioz në merkato, pasi sic raporton “Corriere Dello Sport” në edicionin e saj të printuar, Hysaj është një emrat më të nxehtë të merkatos pasi për të vec Napolit interesohen edhe klube të tjera si Chelsea apo Schalke 04.
