Ish-sekretari i Aleancës për Ardhmërinë e Kosovës (AAK), Burim Ramadani, ka komentuar në lidhje me arrestimin e fundit të tre personave në liqenin e Badovcit, si të dyshuar për terrorizëm.
Ramadani, njohës i çështjeve të sigurisë, ka thënë se rreziku nga sulmet terroriste nuk është i papritur, porse, fatkeqësisht, sipas tij, “shoqëria dhe institucionet e Kosovës nuk kanë dashur ta shohin këtë rrezik”.
Madje, sipas tij, kanë demonizuar pothuajse të gjithë ata dhe ato që kanë ngritur alarmin qysh vite më parë.
“Radikalizimi, që ka filluar vite më parë, dhe tru-shpëlarja e organizuar dhe financuar nga organizata e rrjete ekstremiste dhe/apo terroriste kanë dhënë pasoja të shumta deri më tash. Por, rreziqet e vërteta për sulme terroriste edhe në Kosovë janë afruar çdoherë e më shumë”, ka theksuar Ramadani.
Ai thotë se Kosova duhet të ndërtojë Programe Kombëtare kundër Ekstremizmit dhe Terrorizmit, për De-Radikalizim dhe Rehabilitim.
“Nuk duhet të presim ndonjë sulm terrorist për t’i hapur sytë. Jemi shumë vonë”, ka përfunduar Ramadani.
