Komisioni Parlamentar për Punë të Jashtme ka filluar mbledhjen ku pritet të arrihet një konsensus midis pozitës dhe opozitës për përpilimin e një deklarate, në lidhje me Demarkacionin me Malin e Zi dhe liberalizimin e vizave që më pas do t’u dërgohet shteteve të Bashkimit Evropian (BE), shkruan Gazeta Express.
Kryetari i Komisionit, Elmi Reçica ka lexuar deklaratën, e cila ndër të tjera theksonte: “Ne deputetët jemi të përkushtuar për integrimin evropian dhe për marrëdhënie të mira me Malin e Zi. Pavarësisht dallimet që kemi koalicioni qeverisës e opozita qëndrojnë të bashkuar për rrugën e integrimit. Ne si përfaqësues kërkojmë mirëkuptimin e vendeve të BE-së që qytetarët e Kosovë të lëvizin të lirë”.
Gjatë mbledhjes përfaqësuesi i “Nismës për Kosovën”, Zafir Berisha, ka kërkuar që të shtohet një paragraf, ku të potencohet se opozita garanton se do të japë kontributin dhe është e zotuar që Demarkacionin me Malin e Zi do ta zgjidhin nëpërmjet rrugës politike.
