Liverpool do të jetë nikoqir i skuadrës serbe të Crvena Zvezdës.

Skuadra angleze do të mirëpres gjatë ditës së mërkure në Anfield Road ekipin beogradas në kuadër të xhiros së tretë të Ligës së Kampionëve.

Kjo do të thotë që mesfushori shqiptar i Liverpoolit, Xherdan Shaqiri do të takohet për herë të dytë gjatë një periudhë kaq të shkurtër me një skuadër serbe.

Para disa muajve sulmuesi shqiptar ishte një realizator i golit të fitores (2-1) së kombëtares zvicerane kundër Serbisë në kuadër të kampionatit botëror, ku Shaqa kishte festuar duke formuar me duar simbolin e shqiponjës.

E duke marrë parasysh se shumë polemika ishin ngritur pas festimit, para takimit ka folur Xherdani për mediat duke thënë se nuk duhet përzier sportin me politikën.

“Do të jetë një ndeshje si çdo tjetër. Në fund, kjo është vetëm një lojë futbolli. Është e rëndësishme dhe duam të fitojmë, por sporti nuk është politikë. Ndoshta do të ketë prej atyre që do të më vërshëllejnë, por për mua është pothuajse si çdo takim tjetër”, tha Shaqiri.

Ndryshe, takimi mes këtyre dyja ekipeve do të duhet të zhvillohet në ora 21:00, ku The Reds konsiderohen favoritë absolut. /Telegrafi/