Gjatë ditës së sotme Inspektorati i Ministrisë së Shëndetësisë do t’ia ndalojë punën gjinekologut turk Ahmet Payasli.
Këtë e ka konfirmuar vetë drejtoresha e Inspektoratit për Gazetën Shneta, Ardita Baraku.
“Gjatë ditës inspektorët do t’ia ndalin punën mjekut në fjalë, pasi për momentin nuk ka licencë pune”, ka deklaruar Baraku.
Payaslit i ka skaduar licenca e punës para 2 muajve. Më 9 shtator ai ka bërë kërkesë për rilicencim në kuadër të Ordinancës së tij Specialistike, por nuk ka marrë përgjigje nga Bordi për Licencim në Ministrinë e Shëndetësisë.
Kreu i këtij Bordi, Hysni Bajrami, ka thënë se Payasli nuk do të rilicencohet derisa Komisioni Etik të japë vendimin për veprimtarinë e mjekut në fjalë.
Komisioni Etik është duke i shqyrtuar shkeljet e gjetura nga bastisja e fundit që i është bërë nga Policia e Kosovës, ATK-ja si dhe Inspektorati i MSH-së.
Gjatë kësaj bastisje atij i janë gjetur barna pa afat, produkte medicinale që përdoren për IVF pa origjinë të njohur, para kesh, si dhe i janë konfiskuar dokumente e loptopë.
