I pari i UNMIK-ut dhe drejtori i të ashtuquajturës Zyra për Kosovën në Qeverinë e Serbisë, kanë diskutuar për raportin që përshkruan gjendjen në Kosovë e që do të prezantohet në mbledhjen e radhës së Këshillit të Sigurimit.
Zahir Tanin e Marko Gjuriq kanë disktuar para mbledhjes që në New York mbahet më 7 shkurt.
Sipas njoftimit për media, Gjuriq ka falënderuar shefin e UNMIK-ut për një analizë objektive të situatës në Kosovë duke theksuar se destabilizimi në terren në periudhën e kaluar ka treguar se është e nevojshme të vazhdohet me periudhën tremujore të raportimit të UNMIK-ut, me qëllim që publiku ndërkombëtar të jetë më i vetëdijshëm për problemet dhe sfidat në Kosovë.
KTV ka raportuar sot se Administrata e UNMIK-ut ka gjasa të bashkëkryesojë CEFTA-n me palën kosovare. Kosova ka marrë këtë vit kryesimin e CEFTA-s, mirëpo, ka shumë gjasa që bashkëkryesues të jetë edhe një përfaqësues i UNMIK-ut.
Megjithëse paralajmëroi që Kosova do të largohet nga kjo marrëveshje, kryesuesi, ministri i Tregtisë dhe Industrisë, Bajram Hasani pranon që kanë marrë një varg vërejtjesh.
Megjithatë, shfaq shpresën se një zgjidhje do të mund të gjendet deri në marsin e këtij viti. Fajin për vazhdimin e pranisë së UNMIK-ut, Hasani ia lë ish-kryenegociatores Edita Tahiri që sipas tij, për shkak të marrëveshjes së përfaqësimit me fusnotë.
Hasani thotë se Kosova do të bëjë të pamundurën që të zgjidhë çdo problem që mund t’u dalë bizneseve kosovare dhe për zgjidhjen e tyre do të punojnë komisionet e ndryshme.
Nga ana tjetër, përfaqësuesit e bizneseve kërkojnë nga institucionet të mos bëjnë përpjekje për të dalë nga kjo marrëveshje, por të punojnë në eliminimin e pengesave jo tarifore.
Kosova është pjesë e kësaj marrëveshjeje nga viti 2006, ku në emër të vendit tonë e nënshkruan përfaqësues të UNMIK-ut. Për shkak të mospërgatitjes së palës kosovare, asnjë produkt i vendit nuk është i mbrojtur.
